بلخ کې د شولې ۱۷۰ ننداریزې قطعې جوړیږي
۲۳ غبرګولی ۱۳۹۸
د بلخ د کرنې، اوبولګولو او مالدارۍ ریاست په پام کې لري، چې په دې ولایت کې د شولو د عصري کرکېلي د ترویج په پار د کتار «ریپا» په ډول د شولو ۱۷۰ ننداریزې قطعې جوړ کړي.
دغه ننداریزې قطعې، چې ددې ولایت په شولګر، شورتپه او کلدار ولسوالیو کې جوړیږي موخه یې بزګرانو ته دکتار « RIPA» په ډول دشولو کرلو د نوي او عصري میتودونو زده کړه او رواجول دي. په دې بڼه د شولو کرکېله د شولو حاصلات له ۲۵ تر ۳۰ سلنه زیاتوي.
د ترلاسه شویو څېړنو پایلې ښیي، که چیرې شولې په محلي ډول دپاشان په شکل وکرل شي نو له یوه هکټاره ځمکه په منځنۍ توګه څلور ټنه شولې په لاس راځي او که چیرې په عصري ډول د کتار په شکل وکرل شي نو له یوه هکټاره ځمکه په منځنۍ کچه شپږ ټنه شولې په لاس راځي.
