پکتیکا کې ۸۰ مالدارانو ته د لبنیاتو د پروسس او لېږد اړین وسایل ووېشل شول
۲۰ لړم ۱۴۰۵ هـ.ش
۳۰ جُمَادَى الأول ۱۴۴۸ هـ.ق
د پکتیکا ولایت د کرنې، اوبو لګولو او مالدارۍ ریاست په همغږۍ، د اړیکو دفتر مؤسسې له لوري د پکتیکا ولایت په مرکز ښرنه کې د ګاري او سکړان کلیو او د یوسفخېلو ولسوالۍ په لاندني زمريکوټ، پورتني زمريکوټ، بوخانخېل، ابده، رشکي او جرکني کلیو کې، چې د اتو واټرشیډونو اړوند دي، ټولټال ۸۰ مالدارانو ته د شېدو د پروسس او لېږد اړین وسایل ووېشل شول.
د یادې مرستې په لړ کې هرې مستحقې مالدارې کورنۍ ته د لبنیاتو د پروسس، راټولولو او لېږد په موخه دوه د ګاز سلنډرونه، یوه د ګاز بخارۍ، پنځه د شېدو د راټولولو لوښي، دوه د پخلي دیګونه، یوه د مستو او کوچو جوړولو ماشین (چرڼۍ)، دوه د شېدو د لېږد لوښي، پنځه د شېدو د چاڼولو سیمي جالۍ، څلور د شېدو د ګډولو وسایل، دوه بوتله د لاسونو ضدعفوني مایع او دوه بستې ماسکونه ورکړل شوي دي.
د یادو وسایلو د وېش بهیر د پکتیکا ولایت د اقتصاد ریاست او د کرنې، اوبو لګولو او مالدارۍ ریاست د استازو او همکارانو په حضور کې ترسره شو.
د دې مرستې اساسي موخه د مالدارانو د کاري وړتیا لوړول، د لبنیاتو د پروسس او لېږد بهیر اسانه کول، د شیدو او لبنیاتو د کیفیت ښهوالی او د زیانمنو کورنیو د اقتصادي وضعیت پیاوړتیا ده.
تمه ده، چې د یادو وسایلو په کارولو سره به په اړوندو سیمو کې د لبنیاتو د پروسس او بازار ته د لېږد فعالیتونه پراخ، د مالدارانو عواید زیات او د هغوی د اقتصادي ځانبسیاینې لپاره به لا زیاتې اسانتیاوې برابرې شي.
