هلمند کې د زعفرانو حاصلاتو ټولولو لړۍ پیل شوې
۳ لیندۍ ۱۳۹۹
د هلمند د کرنې، اوبولګولو او مالدارۍ ریاست په دې ولایت کې د زعفرانو د کرکېلي د دودولو په پار بزګرانو ته د زعفرانو ۱۲ننداریزې قطعې جوړې کړې وې، چې اوس یې د ګل ټولولو وخت دی. د هلمند دکرنې رییس زلمي الکو وایي، چې په دې ولایت کې د زعفرانو کرکېله بریالی وه او هیله یې وښودله چې په دې ولایت کې د زعفرانو کرکېله پراخه شي.
د هلمند د کرنې رییس زلمی الکو وایي، چې په دې ولایت کې د زعفرانو دودولو په پار ۱۲ ننداریزې قطعې جوړې شوې وې. د ښاغلي الکو په خبره ددغو ۱۲ ننداریزو قطعو د جوړولو په پار پر ۱۲ بزګرانو د زعفرانو پیاز او نور اړین توکي وېشل شوي او ترڅنګ یې یادو بزګرانو ته د قلبې او د ځمکې د هوارولو لګښتونه هم ورکړل شوي وې.
د هلمند دکرنې رییس زلمی الکو وویل، چې ددغو مرستو موخه په دې ولایت کې د زعفرانو د کرکېلي دودول او له دې لارې د بزګرانو د عوایدو زیاتول دي. هغه وویل، چې د هلمند ولایت اقلیم د زعفرانو کرکېلي لپاره مناسبه اقلیم ده او هیله یې وښودله چې په دې ولایت کې د زعفرانو کرکېله پراخه شي.
باید وویل شي، چې تېرکال هم په دې ولایت کې د زعفرانو ۱۵ ننداریزې قطعې جوړ شوي و، چې د قناعت وړ حاصل ترې تر لاسه شوه.
