د اوبولګولو نوي لارې چارې: کونړ کې ۴۰۰ زره جریبه ځمکه د لمریزې برېښنا له لارې خړوبیږي

۷ لړم ۱۳۹۹
د کرنې، اوبولګولو او مالدارۍ وزارت په دې وروستیو کې د کرنې د ودې، د حاصلاتو زیاتوالي او د بزګرانو د عواید د زیاتولو په پار د للمي او شاړو ځمکو د خړوبولو نوي لارې چارې ته مخه کړی، چې په یوشمېر ولایتونو کې بزګرانو او بڼوالو ته د دوی د ځمکو د خړوبولو په پار له لمریزې برېښنا کار اخلي. ددغو ولایتونو له ډلې یو هم د کونړ ولایت دی. د کونړ په ولایت کې ۱۸ زره او ۳۰۰ هکټاره اوبیزې او شپږ زره او ۳۰۰  هکټاره للمي ځمکې باندې کرکېله کیږي.
د کونړ د کرنې چارسمبال رییس نجیب الله عادل وایي، چې ددې ولایت د شاړو ځمکو د خړوبولو په پار ددې ولایت په یوشمېر ولسوالیو کې یوه انداز للمي او شاړې ځمکې د لمریزې انرژۍ له لارې خړوبې شوي دي او ټاکل شوې ده، چې تر یوې اوونۍ پورې به ددې ولایت ۴۰۰ زره جریبه نور للمي او شاړې ځمکې هم د لمریزې انرژۍ له لارې د خړوبولو تر پوښښ لاندې راشي.
دغه پروژه د کرنې وزارت له خوا د کونړ ولایت په لاهوري ډاک کې پلي کیږي، چې سرکاڼو، مروره او نارنج ولسوالۍ په برکې نیسي.
ددې پروژې ټولیز لګښت ۹۱.۲ میلیونه افغانۍ ده.
یادې ځمکې تر دې مخکې د للمي په ډول کرل کېده او د اوبو د نشتون په صورت کې له دغو ځمکو څخه هیڅ ډول حاصل لاس ته نه راتله. د کونړ د کرنې ریاست وایي، چې دغه ځمکې د سیند له تله لوړ دي، چې د لمریزې برېښنا په سیسټم ددغو ځمکو سمبالول په دې سیمه کې د اوبولګولو ستونزه د تل لپاره هواره وي.
د کونړ ولایت د کرنې ریاست چارواکي په پام کې لري، چې په دې ولایت کې د لمریزې انرژۍ پر امټ د اوبولګولو  نور سیسټمونه هم جوړ کړي.