۲۵ زمری ۱۳۹۹

د هغې برنامې پر بنسټ چې د کرنې، اوبولګولو او مالدارۍ وزارت له خوا د اوبولګولو د دویمې او درېیمې درجې د ۴۳۵ فرعي کانالونو د بیارغونې په پار د ۱۳۹۹یم مالي کال لپاره طرح شوې وه، د یادو کانالونو د بیارغونې چارې ۴۲ سلنه بشپړ شوي دي.

دغه کانالونه د کندز، تخار، بدخشان، ننګرهار او جوزجان په ولایتونه کې شتون لري.

د کرنې وزارت د روان مالي کال د لومړیو شپږو میاشتو کاري راپور ښیي، چې د دغو کانالو له ډلې د ۹۹ کانالونو د بیارغونې ۳۵ سلنه چارې له تېر کال څخه پاتې وه او د ۳۳۶ نورو کانالونو د بیاروغونې چارې سږکال پیل شوي دي. ددې راپور پر بنسټ تر دې دمه د یادو کانالونو د بیارغونې چارې ۴۲ سلنه بشپړ شوي دي او ټاکل شوې ده، چې د روان مالي کال تر پایه بشپړ او ګتې اخیستنې ته وسپارل شي.

د اوبولګولو د یادو کانالونو بیارغول په هېواد کې د اوبولګولو د سیسټمونو د پیاوړتیا او بیارغونې له لارې په کلنۍ ډول د ۵۰ زره هکټاره ځمکو د خړوبولو په طرحه کې شامل دي.