هلمند کې د درېیو زهکشۍ کانالونو د پاکولو چارې په چټکۍ سره روانې دي
۳ لړم ۱۴۰۵ هـ.ش
۱۳ جُمَادَى الأول ۱۴۴۸ هـ.ق
د هلمند ولایت د کرنې، اوبولګولو او مالدارۍ ریاست له لوري د لښکرګاه ښار د بولان سیمې او د ګرشک او سنګین ولسوالیو اړوند د درېیو زهکشۍ کانالونو د پاکولو او بیارغونې چارې په چټکۍ سره روانې دي.
یادې پروژې چې څه موده وړاندې پیل شوې دي، د مسلکي انجنیرانو تر مستقیمې څارنې لاندې پلې کېږي او موخه یې د کرنیزو ځمکو د اضافي اوبو ایستل، د ولاړو اوبو له امله د رامنځته شویو ستونزو کمول او د کرنیزو ځمکو د بیا فعالولو لپاره د مناسبې زمینې برابرول دي.
د معلوماتو له مخې، د لښکرګاه ښار د بولان سیمې اړوند د زابر کانال، چې شاوخوا اووه کیلومتره اوږدوالی لري، د کندنکارۍ چارې بشپړې شوې دي او د کانال په مسیر کې یو پلچک هم جوړ شوی دی.
همدارنګه، د ګرشک ولسوالۍ اړوند د ادینزو زابر د کندنکارۍ چارې بشپړې شوې او د پلچک جوړولو بهیر یې روان دی.
د همدې ولسوالۍ د ادینزو زابر د کندنکارۍ چارې هم په جریان کې دي.
دغه پروژې د کرنې، اوبولګولو او مالدارۍ وزارت له پراختیايي بودجې څخه د ۵ میلیونه، ۴۳۹ زره او ۹۸۵ افغانیو په ټولیز لګښت پلې کېږي، چې په ترڅ کې به یې د ۱۷.۸۷۶ کیلومتره په اوږدوالي د زهکشۍ کانالونو د پاکولو او اړوندو ساختماني چارو بهیر بشپړ شي.
د یادو پروژو په بشپړېدو سره به شاوخوا ۶ زره جریبه کرنیزه ځمکه له اضافي اوبو او د ولاړو اوبو له ستونزې څخه وژغورل شي، چې په پایله کې به یې د ځمکو د حاصلخېزۍ د ساتنې، د کرنیزو ځمکو د بیا فعالولو او د دوهفصله کرنې د پراختیا لپاره زمینه برابره شي.
د هلمند ولایت د کرنې، اوبولګولو او مالدارۍ ریاست مسؤلین وایي، د زهکشۍ کانالونو پاکول او بیارغونه د کرنیزو ځمکو د ساتنې، د اضافي اوبو د ایستلو او د کرنیزو فعالیتونو د ښهوالي لپاره ځانګړی اهمیت لري ، د دغو پروژو په بشپړېدو سره به د ولاړو اوبو له امله د کروندګرو ستونزې راکمې او د کرنیزو ځمکو د اغېزمنې ګټې اخیستنې ترڅنګ به د حاصلاتو د زیاتوالي او د کروندګرو د اقتصادي وضعیت د ښهوالي لپاره هم زمینه برابره شي.
د هلمند ولایت د کرنې، اوبولګولو او مالدارۍ ریاست هڅه کوي، چې د پراختیايي پروژو د پلي کولو له لارې د کرنې سکتور پیاوړی، کرنیزې ځمکې خوندي او د کروندګرو ستونزو ته اغېزمنې حللارې برابرې کړي.
