کونړ ولایت کې د انټیروټوکسیمیا واکسین د تطبیق پروګرام پیل شوو

۱۱ چنګاښ ۱۴۰۵ هـ.ش
۱۶ مُحَرَّمُ الحَرام ۱۴۴۸ه‍.ق
د کونړ د کرنې، اوبو لګولو او مالدارۍ ریاست په هڅو، د افغانستان لپاره د هالینډ کمېټې په تخنیکي همکارۍ او د کرنې نړۍوال صندوق په مالي ملاتړ، د ۳۷,۵۰۰ کوچنیو شخوند وهونکو څارویو لپاره د انټیروټوکسیمیا (څارویو لیونتوب) واکسین د تطبیق پروګرام رسماً پیل شو.
د پروګرام د پرانیستې پر مهال د کونړ دکرنې ریاست د مالدارۍ خدماتو او څارویو د روغتیا آمر څرګنده کړه، چې د یاد پروګرام اساسي موخه د مالدارۍ سکتور پیاوړتیا، د ساري ناروغیو مخنیوی، د څارویو د روغتیا خوندیتوب او د مالدارانو اقتصادي ملاتړ دی.
د معلوماتو له مخې، دغه پروګرام به د کونړ ولایت په نورګل، خاص کونړ، څوکۍ، اسعدآباد او چپې درې ولسوالیو کې عملي شي او ټاکل شوې ده، چې زرګونه کوچني شخوند وهونکي څاروي تر پوښښ لاندې راولي.
تمه کېږي، چې د داسې پروګرامونو په بریالي تطبیق سره به د څارویو د ناروغیو کچه راټیټه، د مالدارۍ تولیدات زیات او د مالدارانو اقتصادي وضعیت لا ښه شي.