ننګرهار کې بزګرانو او د سیمې اوسیدونکو ته د طبیعي زېرمو ساتنې او اوبو ښه مدیریت په برخه کې روزنه پیل شوه

۲۲ زمری ۱۴۰۴ هـ.ش
۱۹ صَفَر المُظَفَّر ۱۴۴۷ هـ.ق 
د ننګرهار کرنې، اوبولګولو او مالدارۍ ریاست په هڅو او د ډنمارک کډوالو نړۍوالې ادارې په تخنیکي او اروپایي ټولني په مالي لګښت د ننګرهار په ۳ ولسوالیو کې ۲۷۰۰ تنو بزګرانو او د سیمي خلکو ته د طبیعي زېرمو، ځنګلونو ساتنې او نورو برخو کې روزنه پیل شوه.
د  ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې په هسکه مېنه، سپین غر او اچین ولسوالیو کې بزګرانو ته د طبیعي زېرمو او اوبو ښه مدیریت په موخه روزنه د ډنمارک نړۍوالې ټولني له لورې پیل شوه. نوموړې وویل بزګرانو ته به په یادو واړه ولسوالیو کې په تدریجي ډول په مختلفو وختونو کې روزنې ورکول کېږي. ښاغلي محسن زیاته کړه، چې ددغو روزنو موخه دطبیعي زېرمو ساتنه او اوبو ښه مدیریت دی او په هغو سیمو کې به ورکړل شي، چې طبیعي زېرمې د تخریب له ګواښ سره تر ډېره مخامخ وي.
ددې پروګرام ګډونوالو ته به د ځنګلونو، څړځایونو ساتني، اوبو ښه مدیریت، پایداره کرنې، خاورې او ایکو سیستم تخریب مخنیوي، اقلم بدلون اغیزې، نړۍوالې تودخې، طبیعي پېښو ګواښونو کمولو او نورو اړونده برخو کې د مسلکي کارکوونکو له لورې روزنه ورکړل شي.