د خوست سپیره ولسوالی کې د ځنګلونو ساتنې، د جلغوزیو محصول او په افغانیو پېر او پلور په اړه ناسته وشوه

۲۲ زمری ۱۴۰۴ هـ.ش
۱۹ صَفَر المُظَفَّر ۱۴۴۷ هـ.ق
د خوست ولایت د کرنې، اوبو لګولو او مالدارۍ ریاست اړوند د سپیرې ولسوالی ولسوال مولوي لطف الرحمن نظامي او د کرنیزو چارو عمومي مدیر نواب جان سلار د سپیرې ولسوالی د اوو ټالو او افغان دوبي قومي مشرانو سره ځانګړې ناسته وکړه.
په دې غونډه کې د ځنګلونو د غیر قانوني قطع کولو مخنیوی، د جلغوزیو محصول اخیستل او د پیر او پلور پروسه په افغانیو ترسره کول د بحث اصلي موضوعات وو.
ګډونوالو د ځنګلونو ارزښت ته په اشارې وویل، چې دا شتمنۍ نه یوازې هوا پاکوي او د ځمکې تودوخه متوازنه ساتي، بلکې د زرګونو ژوو او مرغانو هستوګنځایونه هم دي. د دوی په وینا، د ځنګلونو له منځه وړل د وچکالۍ، سېلابونو او د ژوند چاپېریال د خرابېدو لامل کېږي، نو له همدې امله د ونو ساتنه، د نویو ونو کېنول او د غیر قانوني قطع مخنیوی د هر وګړي ګډ مسؤلیت دی.
په ناستې کې د جلغوزیو ۱۰٪ محصول اخیستل او د هغې د پیر او پلور پروسه په افغانیو ترسره کول، د ملي اقتصاد د پیاوړتیا، د بزګرانو د عادلانه ګټې او د طبیعي شتمنیو د خوندي کولو مهم ګامونه وبلل شول.
ګډونوالو یو ځل بیا ژمنه وکړه، چې د زرغون افغانستان لپاره به په ګډه هڅې کوي او د خپلو طبیعي شتمنیو په ساتنه کې به له هېڅ کوښښ څخه ډډه نه کوي.