د بلخ شولګرې ولسوالی کې له ۸۰ یتیمو ماشومانو سره د چرګانو مرسته پیل شوه

۱۴ زمری ۱۴۰۴ هـ.ش
۱۱ صَفَر المُظَفَّر ۱۴۴۷ هـ.ق
د بلخ دکرنې، اوبولګولو او مالدارۍ ریاست دهڅو او د سولې کلي دفتر د بشردوستانه فعالیتونو د دوام په لړ کې دا ځل د بلخ ولایت شولګرې ولسوالی په ۹ کلیو کې له یتیمو ماشومانو سره د چرګانو مرسته وکړه.
یاده مرسته د بلخ د کرنې، اوبو لګولو او مالدارۍ ریاست او د شولګرې ولسوالی د کرنیزو خدماتو مدیریت مسؤلینو په حضور کې ترسره شوه. د راپور له مخې، په دې مرحله کې ۴۰ یتیمو ماشومانو ته ۱۴ هګی ورکونکي چرګان، یوه ۴۰ کیلو ګرامه بوجۍ د چرګانو دانه، او نور اړوند وسایل ووېشل شول.
چارواکي وایي چې په یاده سیمه کې شاوخوا ۸۰ یتیم ماشومان سروې شوي وو، چې له ډلې یې ۴۰ تنه له مرستو برخمن شول او پاتې ماشومانو ته به په نږدې راتلونکې کې مرسته ورسول شي.
د بلخ دکرنې ریاست چارواکي دا مرسته د یتیمانو د اقتصادي ملاتړ، د خوراکي توکو د تأمین او د کوچنیو کورنیو د معیشتي وضعیت د ښه والي په موخه مهم ګام بولي.