د سپين خوړ محافظوي پولو د بیا رغونې چارو څخه لیدنه وشوه
۱۸ وری ۱۴۰۴ ه.ش
۹ شَوّالُ المُکَرَّم ۱۴۴۶ه.ق
د ننګرهار وادي کرنيز امارتي شرکت اجرائیوي رئیس سید محمد نعیم محمدي د درېیم فارم د بلاکونو ترمنځ د سپين خوړ محافظوي پولو د بیارغونې روانو چارو څخه لیدنه وکړه. نوموړي د کار د پرمختګ لپاره اړوند مسؤولینو ته لازمې لارښوونې وکړې او د ماشین چلوونکو هڅونې لپاره یې هغوی ته نغدي ډالۍ هم ورکړې.
د ننګرهار وادي کرنيز امارتي شرکت اجرائیوي رئیس سید محمد نعیم محمدي د درېیم فارم اړوند د پنځم او شپږم بلاکونو ترمنځ د سپين خوړ تخریب شويو محافظوي پولو د بیا ترمیم، جوړولو او د رسوباتو پاکولو له روانو چارو څخه لیدنه وکړه.
په دې لیدنه کې له نوموړي سره د درېیم فارم د کرنې عمومي مدیر انجنیر عتیقالله او ځینو نورو مسؤولینو هم ملتیا کوله. د لیدنې پر مهال اجرائیوي رئیس د چارو د لا ښه پرمختګ لپاره مسؤولینو ته لازمې لارښوونې وکړې او د همکارۍ ډاډ یې ورکړ.
همداراز، نوموړي د ۲۳م او ۲۴م نمبر ویالو څخه هم د اوبو د تنظیم او مدیریت په موخه څارنه او نظارت ترسره کړ، تر څو اوبه کرنیزو سیمو ته په عادلانه او مؤثر ډول ورسېږي.
د ننګرهار وادي کرنيز امارتي شرکت د کروندګرو د خدمت او د کرنیزو چارو د پیاوړتیا لپاره ژمن دی او هڅه کوي چې د اوبو مدیریت، محافظوي جوړښتونه او کرنیز خدمات لا زیات منظم کړي.
