د کرنې وزیر د هلمند له والي سره د بدیل کښت او د بڼوالۍ پر پراختیا خبرې وکړې

۱۵ لړم ۱۳۹۸
دکرنې، اوبولګولو او مالدارۍ وزیر نصیر احمد درانی دخپل کار په دفتر کې د هلمند له والي محمدیاسین خان سره وکتل.
په دې لیدنه کې د هلمند والي د دې ولایت کرنې او بڼوالۍ ته د کرنې وزارت له پاملرنې مننه وکړه او وویل، چې د کرنې وزارت د پاملرنې له امله ددې ولایت د کرنې د سکټور ستنزې حل شوي او د کرنې وزارت ژمني هم عملي شوي دي.
د هلمند والي ددې ولایت د کرنیزو حاصلاتو د زیاتوالي خبره هم وکړه او ویې ویل: «زموږ حاصلات د غنمو په برخه کې ۳۰ سلنه او د مېوو په برخه کې ۱۵ سلنه زیاته شوې ده، په هلمند کې د سټرسو بڼونه او تولیدات ډېر شوي او بڼونو جوړولو ته د بزګرانو لېوالتیا زیاته شوې ده.»
د هلمند والي دغه راز ددې ولایت بڼوالۍ او مالدارۍ برخې ته د لا زیاتې پاملرنې غوښتنه وکړه او ترڅنګ یې په دې ولایت کې د یوې سړې خونې پر جوړولو د تمر کز غوښتنه هم وکړه.
په دې لیدنه کې دکرنې، اوبولګولو او مالدارۍ وزیر نصیر احمد درانی د هلمند د بڼوالۍ د پراختیا په پار د همکاریو ژمنه وکړه او دغه راز یې وویل، چې په ۱۳۹۹ یم کال ددې ولایت د ځنګلونو پر پراختیا هم ډېر کار کیږي. د کرنې وزیر وویل له هغو سړوخونو څخه چې ټاکل شوې په هېواد کې جوړ شي، یوه به یې په هلمند ولایت کې جوړیږي. ښاغلی درانی وویل، چې هلمند د افغانستان کندو دی او دکوکنارو د بدیل په پار په دې ولایت کې د مېوو بڼونه ډېریږي او د آلویه‌ورا کرکېله به هم له پخوا ډېر ترویج شي.