کونړ کې د طاعون ناروغۍ پر وړاندې د واکسین کمپاین پیل شو
۵ زمری ۱۴۰۵ هـ.ش
۱۲ صَفَر المُظَفَّر ۱۴۴۸ هـ.ق
د کرنې، اوبو لګولو او مالدارۍ وزارت د څارویو د روغتیا د خوندي کولو او د مالدارۍ سکټور د پیاوړتیا په موخه، د خوړو او کرنې نړۍوالې ادارې «افاېاو» په مالي ملاتړ او د کونړ د کرنې ریاست په همغږۍ، د وړو شخوند وهونکو څارویو د طاعون ناروغۍ پر وړاندې د واکسین کمپاین پیل کړ.
د دې کمپاین موخه د مالدارانو د څارویو ساتنه، د طاعون ناروغۍ د خپرېدو مخنیوی او د مالدارۍ سکټور پیاوړتیا ده. ټاکل شوې ده چې یاد کمپاین د کونړ ولایت په مرکز او ټولو ۱۵ ولسوالیو کې تطبیق شي.
د پلان له مخې، نږدې ۱۰۰ زره ډوزه واکسین به د خصوصي ساحوي وترنر ډاکټرانو له لوري پر پسونو او وزو په وړیا توګه تطبیق شي، څو څاروي د دې خطرناکې ساري ناروغۍ پر وړاندې خوندي شي.
د کونړ ولایت د کرنې، اوبو لګولو او مالدارۍ ریاست له ټولو مالدارانو او کوچیانو غوښتنه کړې، چې خپل د واکسین شرایطو برابر څاروي واکسین کړي، ترڅو دطاعون ناروغۍ پر وړاندې معافیت ترلاسه او د احتمالي اقتصادي زیانونو مخه ونیول شي.
