ډنمارک افغان بزګرانو سره درې میلیونه ډالره مرسته کوي
۱ سلواغه ۱۳۹۸
د ډنمارک شاهي هېواد په پام کې لري، چې سېلاب او وچکالۍ ځپلو بزګرانو سره درې میلیونه ډالره مرسته وکړي. دغه مرسته د ۱۵ زره او ۵۰۰ کروندګرو کورنیو د تغذیې او خوړو خوندې توب په پار د بدخشان، دایکندي، غور، هرات او اروزګان په ولایتونو کې له اړمنو بزګرانو سره کیږي.
بزګرانو سره د یادې مرستې د هوکړه لیک په لاسلیک غونډه کې د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري وويل: «دغه مرسته زیانمنو بزګرانو، کروندګرو مېرمنو او هغو مېرمنو سره، چې اقتصادي ستونزې لري او کورنۍ ور په غاړه ده کیږي.»
ښاغلي غفوري زیاته کړه، چې د غه مرسته د اصلاح شویو تخمونو، کیمیاوي سرو، د کرکېلي او کورنیو باغچو اړونده توکو د وېش او د اوبولګولو د سیسټمونو د بیارغونې د پروژو په لاره اچولو سره تر سره کیږي. هغه زیاته کړه: «دغه پروژه په یوه کال کې بشپړیږي. موږ هیله من یو چې ددې پروژې په پلي کولو سره وکولای شو، چې د زیانمنو کورنیو اقتصاد ته وده ورکړو.»
دغه راز په کابل کې د ډنمارک سفیر میکایل لونډ جیبسن، بزګرانو سره د ډنمارک د درې میلیوني مرستې په لاسلیک غونډه کې وویل: «د ډنمارک هېواد پرمختللی افغانستان غواړي. ډنمارک له نورو ډونرونو سره یو ځای په بېړنیو حالاتو کې تل د سېلاب ځپلو او وچکالۍ ځپلو سره مرسته کړې او په دې برخه کې خپلې مرستې ته دوام ورکوي.»
په افغانستان کې د ملګرو ملتونو د خوړو او کرنې سازمان «FAO» مشر راجندال آریال هم د افغان بزګرانو د اقتصادي شرایطو د ښه والي په پار د ډنمارک له مرستو د خوښی تر څنګ وایي، چې په افغانستان کې د سېلابونو او وچکالۍ له امله ډېر شمېر کورنۍ خوراکي خوندیتوب نه لري. هغه وویل: «زه په دې باوریم چې دغه مرسته د زیانمنو بزګرانو د ژوند دښه کولو په برخه کې مثبتې اغېزې لري.»
د ډنمارک هېواد له ۲۰۰۱ زېږدیز کال را په دې خوا افغانستان سره د کرنې د سکټور په برخه کې مالي ملاتړ او همکاري کوي.
