پکتیکا کې د شنو ونو د ناقانونه وهلو په تړاو دوه تنه ونیول شول

۱۲ زمری ۱۴۰۵ هـ.ش
۱۹ صَفَر المُظَفَّر ۱۴۴۸ هـ.ق
د پکتیکا ولایت د کرنې، اوبو لګولو او مالدارۍ ریاست وايي، چې د شکین ولسوالی په دوو بېلابېلو سیمو کې د شنو ونو د ناقانونه پرېکولو په تړاو دوه تنه نیول شوي او د قانوني اجراآتو لپاره عدلي او قضايي ارګانونو ته سپارل شوي دي.
د یاد ریاست د معلوماتو له مخې، یو تن د شکین ولسوالی د شریونیتو کلي او بل تن د اسالوخان کلي په اړونده سیمه کې د شنو ونو په ناقانونه وهلو بوخت وو، چې د شکین ولسوالۍ د استخباراتو له همکارۍ او د کرنې ریاست د مسؤلینو په ګډو هڅو ونیول شول.
نیول شوي کسان د قانوني څېړنو او لازمو اجراآتو په موخه جنايي ادارې ته سپارل شوي، ترڅو د نافذه قوانینو له مخې ورسره چلند وشي.
د پکتیکا ولایت د کرنې، اوبو لګولو او مالدارۍ ریاست د طبیعي ځنګلونو او شنو ونو ساتنه خپله اساسي دنده ګڼي او ټینګار کوي، چې د طبیعي سرچینو ساتنه د ټولو ګډ مسؤلیت دی. دغه ریاست له هېوادوالو غواړي، چې د ځنګلونو او شنو ونو د ساتنې په برخه کې له اړوندو ادارو سره همکاري وکړي او د شنو ونو د ناقانونه پرېکولو او د طبیعي سرچینو د تخریب مخه ونیسي.