ننګرهار کې ۵۲۳ زره څارويو د طبق ناروغۍ ضد واکسین کمپاین پیل شو
۲۰ لړم ۱۴۰۵ هـ.ش
۳۰ جُمَادَى الأول ۱۴۴۸ هـ.ق
د ننګرهار ولایت د کرنې، اوبو لګولو او مالدارۍ ریاست له لوري، د ملګرو ملتونو د خوړو او کرنې ادارې «افاېاو» په مالی همکارۍ، د دغه ولایت په مرکز او ټولو ولسوالیو کې پر شاوخوا ۵۲۳ زره غټو او کوچنیو شخوند وهونکو څارویو د طبق «افامډي» ناروغۍ ضد واکسین کمپاین پیل شو.
د یاد کمپاین په ترڅ کې به د ننګرهار ولایت په مرکز او ټولو ولسوالیو کې ۳۷۴ زره غټ شخوند وهونکي څاروي (غواګانې) او ۱۴۹ زره کوچني شخوند وهونکي څاروي (پسونه او وزې) د طبق ناروغۍ پر وړاندې واکسین شي.
د یادونې وړ ده، چې د ملګرو ملتونو د خوړو او کرنې ادارې «افاېاو» له لوري د طبق ناروغۍ د مخنیوي او کنټرول په موخه د غټو او کوچنیو څارویو لپاره د «افامډي» واکسین مرسته شوې وه.
طبق «افامډي» یوه ساري ویروسي ناروغي ده، چې غټ او کوچني شخوند وهونکي څاروي پرې اخته کېږي او د څارویو روغتیا، تولیداتو او د مالدارانو پر اقتصاد ناوړه اغېز کوي. د دې ناروغۍ پر وړاندې د واکسین تطبیق د ناروغۍ د خپرېدو په مخنیوي او د څارویو د روغتیا په ساتنه کې مهم رول لري.
تمه ده، چې د دغه واکسین کمپاین په بشپړېدو سره به د ننګرهار ولایت د ګڼ شمېر څارویو روغتیا خوندي، د حیواني محصولاتو تولیدات زیات او د مالدارانو اقتصادي وضعیت پیاوړی شي. همدارنګه، د کمپاین په ترڅ کې به مالدارانو ته د حیواني ناروغیو د مخنیوي او کنټرول په اړه عامه پوهاوی هم ورکړل شي.
