د ننګرهار د کرنې رییس د بزګرانو ستونزو حل په موخه نازیان ولسوالی ته سفر وکړ
۲۴چنګاښ ۱۴۰۳ه.ش
۸ مُحَرَّمُ الحَرام ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن دکرنې او مالدارۍ پراختیا او بزګرانو د ستونزو حل په موخه د نازیانو ولسوالۍته سفر وکړ.
ددې سفر په ترڅ کې د ننګرهار د کرنې رییس دنازیانو ولسوال ګل بصر اسد امیر، مرستیال ولسوال او ترویج مدیرانو سره په کتنه کې ددې ولسوالی د بزګرانو او مالدارانو پر ستونزو او حل لارو خبرې اترې وکړې.
په دې کتنه کې د نازیانو ولسوال ګل بصر اسد امیر په نازیانو ولسوالی کې د کرنې او مالدارۍ په برخه کې خپلې ستونزې او مشکلات شریک کړل.
ښاغلی امیري په نازیانو ولسوالی کې د ترویج وداني، ګودامونو،روغنیاتو، ځنګلونو پریکولو مخنیوي، بڼوالۍ، مصنوعي ځنګلونو کرلو، اصلاح شوي تخمونو، مالدارۍ واکسینونو، حیواني خوراکی او نورو اړونده برخو کې خپلې ستونزې او غوښتنې شریکې کړې.
په همدې حال کې د ننګرهار د کرنې، اوبولګولو او مالدارۍ رییس مولوی محمد ولي محسن د یادې ولسوالی مسؤلینو، بزګرانو او ولسونو ته د کرنې او مالدارۍ په برخه کې د هر راز همکارۍ ډاډ ورکړ.
ښاغلي محسن وویل نازیان ولسوالۍ داسې اراضي لري، چې هم پکي نباتات او هم بڼوالي ښه نتیجه ورکوي، خو ددې ولسوالی بزګرانو او مالدارانو ستونزې درک کوو د کرنې ریاست تر چتر لاندې همکارو مؤسسو سره د موثره او ګټورو پروژو پلي کولو، متوازن پرمختګ، اصلاح شوي تخمونو ترویجولو،څارویو ته واکسینونو تطبیق، مالدارۍ د ښو نسلونو ترویج، حیواني خوراکې وېش، بازار موندنې، حیواني محصولاتو کیفیت ښه کولو او ګڼورو برخو کې د بزګرانو او مالدارانو سره د په مختلفو برخو کې مرستې او همکارۍ کوو.
باید وویل شي، چې د ننګرهار د کرنې، اوبولګولو او مالدارۍ ریاست هر کال په زرګونه بزګرانو او مالدارانو سره د کرنې او مالدارۍ په برخه کې مرستې او همکارۍ کوي.
