د افغانستان د کرنې وزارت پلاوي د هند د کرنیزو څېړنو مؤسسې له چارواکو سره وکتل

۲۰ چنګاښ ۱۴۰۵ هـ.ش
۲۵ مُحَرَّمُ الحَرام ۱۴۴۸ه‍.ق
د افغانستان اسلامي امارت د کرنې، اوبو لګولو او مالدارۍ وزارت پلاوي، د هند جمهوریت ته د خپل رسمي سفر په دوام، د هند د کرنیزو څېړنو شورا او د هند د کرنیزو څېړنو انسټېټیوټ  له مسؤولینو سره وکتل او د کرنې په برخه کې یې د علمي، روزنیزو او څېړنیزو همکاریو د پراختیا په اړه خبرې وکړې.
په دې لیدنه کې د کرنې، اوبو لګولو او مالدارۍ وزارت د مقام سلاکارانو عبدالولي وزیري او عبدالجلیل زاهد، او همدارنګه د افغانستان د کرنې او مالدارۍ خونې یو شمېر مسؤولینو ګډون کړی و.
د غونډې په ترڅ کې دواړو لوریو د کرنیزو څېړنو، د علمي تجربو د تبادلې، د ګډو څېړنیزو همکاریو د پراختیا، د افغان متخصصینو د ظرفیت لوړولو او د افغانستان د کرنې سکټور د ودې لپاره له علمي لاسته راوړنو څخه د ګټې اخیستنې په اړه بحث او د نظرونو تبادله وکړه.
د هند د کرنیزو څېړنو شورا او د هند د کرنیزو څېړنو انسټېټیوټ چارواکو له افغانستان سره د همکاریو د پراختیا هرکلی وکړ او ډاډ یې ورکړ، چې په دغو علمي بنسټونو کې به هر کال د افغان زده کړیالانو او استادانو د ګډون زمینه برابره کړي او د کرنیزو څېړنو په برخه کې به خپلې همکارۍ له افغانستان سره دوامدارې وساتي.
همدارنګه دواړو لوریو هوکړه وکړه، چې د کرنې په بېلابېلو برخو کې به ګډ څېړنیز پروګرامونه ترتیب او پلي کېږي، او د پوهې، تجربو او علمي ظرفیتونو د تبادلې له لارې به د افغانستان او هند ترمنځ د کرنیزو همکاریو د لا پراختیا زمینه نوره هم برابره شي.
د یادونې وړ ده، چې د هند د کرنیزو څېړنو شورا  د دغه هېواد له سترو کرنیزو علمي او څېړنیزو بنسټونو څخه ده، چې د نباتي څېړنو، د متخصصینو د روزنې، د کرنیزو ټکنالوژیو د لېږد او نړۍوالو همکاریو په برخو کې فعالیت کوي. دغه بنسټ د خپلو علمي همکاریو په چوکاټ کې د افغانستان په ګډون د بېلابېلو هېوادونو د زده کړیالانو لپاره روزنیز پروګرامونه او تحصیلي بورسونه هم تنظیم او مدیریت کوي.
دا لیدنه هند ته د افغانستان د کرنې، اوبو لګولو او مالدارۍ وزارت د پلاوي د رسمي سفر د پروګرامونو په چوکاټ کې ترسره شوه، چې موخه یې د علمي اړیکو پیاوړتیا، د تجربو تبادله او د کرنې په برخه کې د دواړو هېوادونو ترمنځ د دوه‌اړخیزو همکاریو پراختیا ده.