خوست کې د سکتوري ادارو او غیر دولتي مؤسسو دولسمه غونډه دائره شوه
د خوست ولایت د کرنې، اوبو لګولو او مالدارۍ ریاست په مشرۍ د سکتوري ادارو او غیر دولتي مؤسسو ترمنځ دولسمه غونډه وشوه.
یاده غونډه، چې د کرنې ریاست سرپرست مولوي اسلم خان منیب په مشرۍ جوړه شوې وه، د قران کریم د څو مبارکو آیتونو په تلاوت سره پیل شوه. ښاغلي منیب د غونډې ګډونوالو ته ښه راغلاست ووایه او د تېرې سکتوري غونډې د پرېکړو او اجرااتو ستاینه یې وکړه.
هغه د سکتوري ادارو او همکارو مؤسسو له هڅو مننه وکړه او ټینګار یې وکړ، چې د ۱۴۰۴ کال لپاره باید پر اوږدمهاله او پایدارو پروژو تمرکز وشي. نوموړي د مثمرو او غیر مثمرو نیالګیو د وېش په برخه کې د همکارو مؤسسو له هڅو ستاینه وکړه او له نورو مؤسسو یې د لا زیاتو همکاریو غوښتنه وکړه.
د غونډې پر مهال، د اقتصاد ریاست استازي انجنیر خدمتالله د ۱۴۰۳ کال د سکتوري غونډو د ارزونې راپور وړاندې کړ. د دغه راپور له مخې، د کرنې او کلیو پراختیا سکتور د ۱۱ غونډو په ترسره کولو سره لومړی مقام خپل کړ.
ورپسې، د ولایت مقام، د کلیو پراختیا ریاست، د اوبو او انرژۍ ریاست، د چاپېریال ساتنې ریاست او د مهاجرینو چارو ریاست استازو هم خپلې ارزونې او وړاندیزونه وړاندې کړل.
په غونډه کې د کرنې ریاست مسلکي سلاکار بهیرګل صابري همکارو مؤسسو ته وویل، چې دوی مکلف دي د بی کیو مطابق د امارتي پروژو تخنیکي او مسلکي نظارت وکړي.
همدارنګه، د کرنې ریاست اړوند چارواکو، لکه مولوي اظهارالدین ابوناصر، مولوي حفیظالله نثار او مولوي کمالالدین کمال، د خپلو څانګو راپورونه وړاندې کړل او د لا ښهوالي لپاره یې سپارښتنې وکړې.
په یاده غونډه کې د ګالو، اکبر، ټي ال او، او آر ډي، او اف اې آر آی ان، آر آر اې اې، ان آر سي او ادا مؤسسو مسؤلینو هم ګډون کړی و.
د غونډې ګډونوالو پرېکړه وکړه، چې د ۱۴۰۴ کال په سکتوري غونډو کې به د ادارو لوړ پوړي مسؤلین ګډون کوي. همدارنګه، د مؤسسو د همغږۍ مسؤل انجنیر ستوري وړاندیز وکړ، چې په ولسوالیو کې د پلي کېدونکو پروژو د ارزونې لپاره دې د اړوند ولسوالیو چارواکي هم د غونډو برخه وي. دغه وړاندیز د ګډونوالو له لوري تصویب شو.
په پای کې، د ولایت مقام استازي مولوي اکبرخان غونډه مثبته وبلله او د ولسوالانو پر ګډون یې ټینګار وکړ. غونډه د اسلامي نظام د دوام او د آباد افغانستان د دعا په ویلو سره پای ته ورسېده.
