د هلمند دکرنې رییس؛ د سویابینو کرکېله د هلمند له اقلیم سره برابره ده او نړۍوال بازار لري

۲۳ وږی ۱۴۰۴ هـ.ش
۲۱ رَبِیعُ الْأَوَّل ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست د هڅو په لړ کې، د ملګرو ملتونو دخوړو او کرنې ادارې «اف.اې.او» په مالي همکارۍ د سویابینو د کرنیز محصول د ترویج او پراختیا پروګرام په بریالیتوب سره عملي شوی دی. د دې پروګرام له لارې په مرکز لښکرګاه او درې ولسوالیو کې ۵۶۰ کروندګرو ته د سویابینو تخمونه، تور او سپینې سرې وېشل شوي او د روزنیزو پروګرامونو له لارې بزګرانو ته اړینې لارښوونې ورکړل شوې.
د پروګرام د ارزونې په موخه، د هلمند د کرنې رییس مولوي نیازمحمد وهاج، د مرکز لښکرګاه د ترویج عمومي مدیر قاري مسلم، د بزګرانو د ټولنې مشر سیدرحیم رحیمي، د «اف.اې.او» مسؤلینو او ګڼ شمېر بزګرانو په ملتیا د بولان سیمې د سویابینو کروندو څخه لیدنه وکړه. نوموړي د کروندو وده او نمو د ستاینې وړ وبلله او وویل، چې بزګران د ښه حاصلاتو هیله لري.
مولوي وهاج د کروندګرو غوښتنې او ستونزې واورېدې او د اړینو مرستو او ملاتړ ډاډ یې ورکړ.
یاد محصول د کورنیو بازارونو ترڅنګ نړۍوالو بازارونو ته هم لار لري او د هلمند د خاورو، اوبو او هوا سره یې بشپړ توافق ښودلی دی، چې دا د ولایت د بزګرانو لپاره د اقتصادي پراختیا یوه مهمه زمینه بلل کېږي.