هلمند کې د امو ننداریز بڼ جوړیږي
![هلمند کې د امو ننداریز بڼ جوړیږي](https://www.mail.gov.af/sites/default/files/2019-09/71708629_2733610886663494_248804079612985344_n.jpg)
۷ تله ۱۳۹۸
د هلمند د کرنې، اوبولګولو او مالدارۍ ریاست چارواکي وایي، چې په دې ولایت کې د امو ونو د ترویج په پار هلې ځلې کوي او د امو ننداریز بڼ جوړولو په موخه یې ۳۰۰ نیالګي تر روزنې لاندې نیولي دي.
د هلمند دکرنې رییس زلمي الکو وایي، چې هلمند د کرنې او بڼوالۍ لپاره مناسبه هوا، پرېمانه اوبه او ښه خاوره لري، نو په همدې اساس د کرنې اداره په پام کې لري، چې د امو ونو د تکثیر او ترویج په پار د امو ننداریز بڼ جوړ کړي.
د ښاغلي الکو په خبره د هلمند د کرنې ریاست د انار باغ نیالګیو روزلو په قوریه کې دا مهال د امو ۳۰۰ نیالګي تر روزنې لاندې نیولي دي، چې ښه وده هم لري.
د یادو ونو د نیالګیو ننداریز بڼ کې به بزګرو ته عملي او نظري روزنې ورکول کیږي ترڅو نور بڼوال او ځمکوال ترې زده کړې وکړي او وهڅيږي چې راتلونکي کې د امو بڼونو ته پراختیا ورکړي.