کونړ کې سوداګریزې شنې خونې او د پیازو زېرمتونونه جوړ او ګټې اخیستنې ته وسپارل شول

۱۵ غویی ۱۳۹۹
د کونړ د کرنې، اوبولګولو او مالدارۍ ریاست وایي، چې د کرنې  وزارت د بڼوالۍ او مالدارۍ ملي پروژې «NHLP» په همکارۍ ددې ولایت په مرکز او څلورو ولسوالیو کې څلور ستر سوداګریزې شنې خونې او د پیازو ۱۰ زېرمتونونه جوړ او ګټې اخیستنې ته وسپارل شول. 
په دغو سوداګریزو شنوخونوکې رومي بانجان، بادرنګ، تور بانجان، شنه مرچ او نور ډول ډول سابه کرل کیږي.
د کرنې وزارت د بڼوالۍ او مالدارۍ ملي پروژې د ارزونې له مخې دغه شنې خونې هر یوه یې د لندۍ له میاشتې د کب تر میاشتې پورې، چې په بازار کې سابه کمیږي خلکو ته تازه سابه او ترکارۍ برابروي. 
دغه سوداګریزې شنې خونې د بادرنګو او رومي بانجانو د کرکېلي او همداراز د بزګرانو د عوایدو زیاتولو او کارموندنې په موخه جوړې شوي دي.
د دغو شنوخونو چاپریال د کنټرول وړ دي او نباتي ناروغیو سره ډېر ژر مبارزه کولای شي. دغه شنې خونې د څاڅکي په سیسټم خړوبیږي، چې د وچکالیو پر مهال ډېر ګټور دي.
په کونړ ولایت کې د دغو سوداګریزو شنوخونو ترڅنګ د بڼوالۍ او مالدارۍ ملي پروژې له خوا د پیازو ۱۰ زېرمتونونه چې هر یوه یې د ۱۰ ټنه پیازو د زېرمه کولو وړتیا لري هم جوړ او ګټې اخیستنې ته وسپارل شول.
د سوداګریزو شنوخونو او د پیازو د زېرمتونو د جوړولو ټولیز لګښت ۴.۴ میلیونه افغانۍ ده.
د کرنې وزارت د بڼوالۍ اومالدارۍ ملي پروژې چارواکي وایي، چې د پيازو د زېرمتونونو په جوړولو سره به د بزګرانو ستونزې هوارې او کال دوولس میاشتې به په مارکېټونو کې پیاز په مناسبه بیه وموندل شي .
ددې ترڅنګ بزګرانو او د پیازو سوداګر د یادو زېرمو په جوړیدو خوښي څرګنده کړه او زیاته یې کړه، چې تر دې وړاندې د سړو خونو د نشتوالي له امله یې پياز په ارزانه بیه پلورل کېدل، چې هم دوی ته هم بزګرانو ته یې زیان  ډېر و.
باید وویل شي، چې په دې وروستیو کلونو کې د کرنې، ابولګولو او مالدارۍ وزارت له خوا بزګرانو او سوداګرو ته د اسانتیاوو برابرولو په پار د هېواد په بېلابېلو ولایتونو کې د پیازو او نورو سبو او مېوو د زېرمه کولو او ساتلو په موخه لسګونه سړې خونې جوړې شوي دي او روان کال کې به هم د کرنیزو محصولاتو د مدیریت د طرحې په اډانه کې په هیواد کې سلګونه سړې خونې جوړ او ګټې اخیستې ته به وسپارل شي.