هلمند کې د مېوه لرونکو او زینتي ونو نیالګیو روزلو د نرسرۍ چارې پیل شوې

۲۴ لیندۍ ۱۳۹۹
د هلمند دکرنې، اوبولګولو او مالدارۍ ریاست له خوا ددې ولایت د انارباغ قوریې اړوند په ۲۰ جریبه ځمکه کې د مېوه لرونکو او بې مېوو نیالګیو د نرسرۍ جوړولو چارې پیل شوي دي.
د هلمند دکرنې رییس زلمی الکو وایي، چې دنیالګیو روزلو په دې نرسرۍ کې به بېلابېل مېوه لرونکي او بې مېوې نیالګي وروزل شي، ترڅو راتلونکې کې ددې ولایت ځمکوالو او بڼوالو ته په واک کې ورکړل شي.
د ښاغلي الکو په خبره د هلمند دکرنې ریاست په دې وروستیو کې پر ډول ډول مېوه لرونکو او زینتي ونو څېړنې کړي دي، چې د ښو پایلو په ترلاسه کولو سره، دا مهال هلې ځلې کوي، چې په قوریو او نرسریو کې یادې ونې ډېرې وروزي او د هلمندي بڼوالو او ځمکوالو په واک کې ورکړي.
زلمی الکو وايي، چې ددې ولایت له خوارې او هوا سره د توافق لرونکو نیالګیو د ډېرولو او د مېوو د نویو ارزښت لرونکو بڼونو د دودولو او تکثیر له لارې غواړي، چې ددې ولایت بزګر او بڼوالو ته کاري فرصتونه برابر او د دوی د عوایدو کچه لوړه کړي.
باید وویل شي، چې سږکال د هلمند دکرنې ریاست له خوا نږدې ۱۰۰ زره او د خصوصي سکټور له لارې څه باندې یومیلیون مېوه لرونکي او زینتي نیالګي وېشلو ته چمتو شوي دي.