ننګرهار کې د بروسلوز ۱۴۴ زره او ۴۴۸ ډوزه واکسین پر څارویو پلي کېږي

۱۲غبرګولی ۱۴۰۰
دننګرهار د کرنې، اوبولګولو او مالدارۍ رياست له خوا ددې ولايت څارویو ته د بروسلوز ناروغۍ د واکسینو د پلي کېدو لړۍ پیل شوې ده.
د ننګرهار کرنې رییس انجنیر انعام الله صافی وايي، د بروسلوز ناروغۍ د مخنیوي په پار ١٤٤ زره او ٤٤٨ ډوزه واکسینونه چې ټولیز ارزښت يې یو میلیونه او٤٤١ زره او ٦٦٩ افغانۍ کیږې په ٢٢ ولسوالیو، «خوګیانو، سره رود، بهسود، بټي کوټ، غني خېل، کامه، کوزکونړ، دره نور، کوټ، شېرزاد، حصارک، لعلپوره، مومندره، پچیراګام، رودات، هسکه مېنه، اچین، دوربابا، سپین غر او نازیانو» کې د وترنرۍ د ٢٥ سیمه ییزو واحدونو له لورې پلي کېږي.
د څارویو ناروغیو د مخنیوي په پار پر څارویو د واکسینونو پلي کول د ننګرهار د کرنې، اوبولګولو اومالدارۍ ریاست یو له مهمو برنامو څخه دی، چې د یاد واکسین په تطبیق سره به د مالدارانو په حیواني محصولاتو کې د پام وړ زیاتوالی راشي او د ناروغیو دخپرېدو مخه به ونیول شي.
یاده ناروغي، چې له څارویو انسانانو ته هم لېږدي، خطرناکه ناروغې ده، چې په همدې موخه د کرنې ریاست له لورې یې د مخنیوې هڅی روانې دي.
د بروسلوز ناروغي د مالدارانو پر اقتصاد مستقیمې اغېزې لري، که چېرې دا ناروغي کنټرول نه شي، نو مالدارانو ته خورا زیات زیان رسېږي.
د ننګرهار د کرنې، اوبولګولو اومالدارۍ ریاست د ولايت په کچه هرکال د څارویو د بروسلوز او نورو ناروغیو د کنټرول په پار د واکسینو کمپاین په لاره اچوي.