د کرنې وزیر د فاریاب ولایت د کرنې ریاست له چارواکو او کارکوونکو سره وکتل
۲۵ لړم ۱۴۰۵ هـ.ش
۵ جُمَادَى الثانی ۱۴۴۸ هـ.ق
د افغانستان اسلامي امارت د کرنې، اوبو لګولو او مالدارۍ وزیر مولوي عطاءالله عمري فاریاب ولایت ته د خپل سفر په ترڅ کې د دغه ولایت د کرنې، اوبو لګولو او مالدارۍ ریاست له رییس، مسوولینو او کارکوونکو سره وکتل او خبرې اترې یې وکړې.
په دې لیدنه کې د کرنې، اوبو لګولو او مالدارۍ وزیر د اداري او تخنیکي چارو پر خپل وخت او مسوولانه ترسره کولو خبرې وکړې او د اداري اصولو پر رعایت، کاري ژمنتیا، د بېلابېلو برخو ترمنځ پر همغږۍ او مراجعینو ته د مناسبو خدمتونو پر وړاندې کولو یې ټینګار وکړ.
نوموړي همدارنګه له مسوولینو او کارکوونکو وغوښتل، چې د خپلو سپارل شویو دندو په ترسره کولو کې لا ډېرې هڅې وکړي او د کرنې، اوبو لګولو او مالدارۍ سکټور د ودې او پراختیا او کروندګرو او مالدارانو ته د غوره خدمتونو وړاندې کولو په برخه کې لازم اقدامات ترسره کړي.
په دې لیدنه کې د فاریاب ولایت د کرنې ریاست مسوولینو او کارکوونکو هم د خپلو کاري مسوولیتونو پر اغېزمن ترسره کولو او د کرنې وزارت د رهبرۍ د لارښوونو پر پلي کولو ټینګار وکړ.
