د حیرتان د قرنطیني شبکې کمپلکس پرانیستل شو

۲۶ غبرګولی ۱۳۹۸
د کرنې، اوبولګولو او مالدارۍ وزیر نصیر احمد درانی بلخ ولایت ته د خپل سفر په ترڅ کې ددې ولایت د حیرتان بندر د قرنطیني شبکې کمپلکس پرانیست.
د کرنې وزارت د هېواد په ۱۳ بندرونو کې ۱۳ قرنطیني شبکې جوړوی، چې ۱۱ شبکې یې بشپړ شوي دي.
د حیرتان قرنطیني شبکه حیواني او نباتي څانګې لري.
ددې شبکې په پرانیست غونډه کې دکرنې وزیر وویل، له دې قرنطیني شبکې څخه په استفادې سره وارداتي محصولات ارزول کیږي او د بېکیفیته کرنیزو محصولاتو د وارداتو مخه نیول کیږي. د کرنې وزیر دغه راز وویل، چې د نړیوال سوداګریز سازمان اړتیاوې او معیارونه هم د قرنطیني شبکو جوړول دي. هغه وویل، چې کرنې وزارت دغه معیارونه عملي کړي او شرطونه یې پوره کړي دي، چې داچاره د کرنیزو محصولاتو پر تدخین او زمونږ پر معیاري صادراتو اغېزه لري.
د کرنې وزیر وویل دوی هلې ځلې کوي، چې د روان کال ترپایه ټول قرنطیني شبکې پر لابراټوارونو سمبال کړي.