ارزګان سږکال ۶۱۰ ټنه زېره توليد کړه

۲ ليندۍ ۱۳۹۹
 دارزګان دکرنې رياست چارواکو په دې ولايت کې دڅه باندې ۶۰۰ ټنه زېره دتوليد خبر ورکوي. د ارزګان دکرنې رييس احمد شاه خيري وايي، "په دې ولايت کې سږکال ۶۱۰ټنه زيره توليد شوې ده، په ټوله کې له دې ډلې څڅه ۵۷۳ټنه یې توره زېره او ۸۰ټنه یې سپينه زېره ده."
ښاغلی خيري په ارزګان کې دزېرې دپېر- پلور په هکله وايي، چې زېره ښه کورني او بهرني مارکېټ لري. د ارزګان دکرنې رييس زياته کړه، چې دزېرې کورني بازار دکندهار او غزني ولايتونه دي او ديادو دوو ولايتونو له لارې دهند او پاکستان هېوادونو ته صادريږي.
هغه وايي، چې زېره کيلو په ۳۰۰افغانۍ خرڅيږي. د ارزګان دولايت په کچه په ۵۴۷ هکټاره ځمکه کې زېره کرل کيږي. له دې ډلې په ۴۹۹هکټار کې يې توره زېره او ۴۸هکټار کې يې سپينه زېره کرل کيږي.
ارزګان دهغو ولايتونو په ډله کې ده، چې دزېرې کرکېلي لپاره مناسب اقليم لري اوددې ولايت په ټولو ولسواليو کې زېره کرل کيږي.