د افغان معيار د چرګانو دانې توليد او چرګانو روزنې فارم څخه دکرنې وزارت د مشرتابه ليدنه

2 اونیمخکې

 د ا.ا.ا دکرنې، اوبولګولو او مالدارۍ وزارت سرپرست مولوی عبد الرحمن  راشد، د ياد وزارت مرستيالان مولوی صدر اعظم اومولوی فضل الباري فضلي د افغان معيار د چرګانو  دانې توليد او چرګانو روزنې فارم څخه ليدنه وکړه.
له دې فارم څخه د ليدنې موخه د چرګانو روزنې د شته وضعيت ارزونه او د چرګانو روزنې دکورني سکټور پياوړتيا ده.
د افغان معيار فارم د چارواکو له خوا د ستونزو او ننګونو تر وړاندې کولو وروسته دکرنې، اوبولګولو او مالدارۍ وزارت مشرتابه په اړوندو برخو کې د هرراز همکاريو ډاډ ورکړ او ويې ويل، چې د چرګانو روزنې د سکټور ودې په پار جدي هلې ځلې کوي.
د يادونې وړ ده، چې د افغان معيار د چرګانو  دانې توليد او چرګانو روزنې فارم د هېواد په کچه له سترو او معياري فارمونو څخه ده، چې په يوه وقت کې د ۳۰۰ زره چرګانو د ساتنې او پالنې وړتيا لري.
دغه راز ياد فارم د ورځې ۲۵۰ زره تازه هګۍ توليد او بازارته وړاندې کوي، ياد فارم د اووه ميليونه امريکايي ډالرو په ارزښت د کرنې د پراختيا صندوق " ADF" په مالي ملاتړ د کابل دګل باغ په سيمه کې جوړه شوې ده، چې ۱۲۰ کسانو ته د کار زمينه برابره کړې ده.