هلمند کې د باراني اوبو مهار او د ناورونو رغولو په موخه د سیمې له مشرانو سره ناستې پیل شوي دي

۷ چنګاښ ۱۴۰۰
هلمند چې، پراخې دښتې او ریګي سیمې لري، له پیړیو راهیسې په یادو سیمو کې د باراني اوبو د مهارولو او د اوبو ذخیره کیدلو په موخه ناورونه جوړ شوي دي، چې د څو لسیزو راهیسې یاد ناورونه د تخریب، ډکېدو او یا هم د له منځه تلو په حالت کې دي .
د هلمند ولایت کرنې، اوبولګولو او مالدارۍ ریاست په هلو ځلو، د کرنې وزارت په پراختیایي بودیجه د۳۵ ناورونو سروې مخکې ترسره شوې ده او دامهال په  پلان کې ده ترڅو یاد ناورونه وروسته له څو لسیزو څخه یوځل بیا ورغول شي، چې په رغیدو سره به یې په  یادو سیمو کې د باران اوبه مهار شي، د ځمکې لاندې اوبه به ډیرې او د مالدارانو د مالونو لپاره د اوبو چمتو کولو ستونزه به ورسره حل شي.
په همدې موخه د هلمند ولایت کرنې، اوبولګولو او مالدارۍ ریاست  چارواکو د ریګ روان قومي مشرانو او متنفذینو سره د 35ناورونو رغولو د کارونو پیل په اړه خبرې اترې کړي دي، چې په ترڅ کې یې، د سیمې قومي مشرانو د یادې پروژې پیل څخه خوښي وښودل او ډاډ یې ور کړ چې د چارو له پیل څخه تر پایه پورې به د ولسونو ملاتړ ورسره وي او په دې برخه کې یې د هر ډول همکارۍ ډاډ ورکړل.