پراختيايي پروژو په هکله نړيوال بانک سره د کرنې وزير خبرې
۱۶ غبرګولي ۱۴۰۰
دکرنې، اوبولګولو او مالدارۍ وزير ډاکټر انوار الحق احدي، د ويډيو کنفرانس له لارې نن په افغانستان کې د نړيوال بانک عملياتي مشرې هما زهرا فتوحي سره د کرنې او خوړو خونديتوب بېړنۍ پروې (EATS) او د OMAID پروژې په هکله خبرې وکړې.
په دې خبرو اترو کې د نړيوال بانک يوشمېر نورو چارواکو او د کرنې او خوړوخونديتوب بېړنۍ پروژې رييس فهيم رحيم هم حضور درلود.
په افغانستان کې د نړيوال بانک عملياتي مشرې هما زهرا فتوحي، يووار بيا د کرنيزو پروژو د ملاتړ په پار ددې بانک دملاتړ ډاډ ورکړ.
مېرمن فتوحي دغه راز د کرنې او خوړو خونديتوب بېړنۍ پروژې د چټک پلي کېدو او ماليې وزارت سره په همغږی د OMAID پروژې د ډيزاين د چارو د چټکتيا غوښتونکی شوه.
دکرنې، اوبولګولو او مالدارۍ وزير ډاکټر انوار الحق احدي له ياد وزارت سره د نړيوال بانک له مرستو څخه د مننې ترڅنګ وويل، هلې ځلې کېږي چې د EATS پروژې د پلي کېدو لړۍ او ددې پروژې له لارې بزګرانو ته د چوپړتياوو وړاندې کولو لړۍ چټک شي.
