لوګر کې د کرنیز نندارتون په لاره اچولو سره د بزګر ورځ ونماځل شوه

۸ وری ۱۴۰۰
د هېواد د نورو ولايتونو ترڅنګ، لوګر کې هم د کرنیز نندارتون په لاره اچولو سره د وري دویمه د بزګر ملي ورځ په ځانګړو مراسمو ونمانځل شول.
په دې مراسمو کې د لوګر والي عبدالقیوم رحیمي ترڅنګ، د ولایت د مالي او اداري چارو مرستیال محمدعمر مرجان، د ولایتي شورا غړی قریب الله سادات، دکرنې رییس، یوشمېراداري رییسانو، قومي مخورو، ځوانانو او سلګونه تنه ځايي اوسېدونکو ګډون کړي و.
د غونډې په پیل کې د لوګر دکرنې رییس د بزګر ملي ورځې د مبارکۍ ترڅنګ ګډونوالو ته د کرنې ریاست دکړنو په هکله مالومات وړاندې کړه.
وروسته د لوګر والي عبدالقیوم رحیمي پخپله وينا کي بزګرانو ته د هغوی د ملي ورځې مبارکي وويل او ترڅنګ يې هیله څرګنده کړه، چي نوی کال به د سولې او ټيکاو کال اوسي.
د لوګر والي وویل: « ډېر د خوشحالۍ ځای دی، چې نن د لوګر په کچه د کورنیو تولیداتو سربېره د ادارو د خدماتو غرفې هم نندارې ته اېښودل شوي دي. د ولایتي ادارې موخه داده، چې خصوصي سکټور ته د کاري چاپېریال د رامنځ ته کولو ترڅنګ له دوی څخه پوره ملاتړ وکړي.»
ښاغلي رحیمي زیاته کړه؛ موږ هڅه کوو تر څو لاسي صنایعو او کورنیو تولیداتو ته بازار موندنه وکړو او په ټوله کې خصوصي سکټور په دغه ولایت کې لا غښتلي کړو.
د غونډې په پای کې ګډونوالو د کرنې ریاست له خوا د کرنیزو توکو نندارتون څخه لیدنه وکړه، چې په کې ډول ډول کرنیز توکي او کورني تولیدات نندارې ته وړاندې شوي ول.