د هرات د انجیل ولسوالۍ په دشت حوض کې د پستې ۳۰ زره هکټاره سوداګریز بڼونه جوړیږي
۲۰مرغومې ۱۳۹۹
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري، د هرات ولایت د انجیل ولسوالۍ په دشت حوض کې د سوداګریزو بڼونو د جوړولو طرحه د کرنې، اوبولګولو او مالدارۍ وزیر ډاکټر انوارالحق احدي ته وړاندې کړه.
ښاغلی غفوري وویل، چې د هرات د انجیل ولسوالۍ دشت حوض په ټولیزه توګه ۴۸زره هکټاره ځمکه ده، چې ددې طرحې پربنسټ، د خصوصي سکټور او د افغانستان دولت په ګډې پانګونې سره په ۳۰ زره هکټاره کې یې سوداګریز بڼونه جوړیږي.
د کرنې وزارت د اوبولګولو د مرستیال په خبره، ددې طرحې د تخنیکي، اقتصادي او ټولیزو مطالعاتو یوه برخه بشپړه شوې ده او په بله برخه یې کار روان دی.
دا طرحه چې، د عالي اقتصادي شورا له خوا منظور شوې ده، ټاکل شوې، چې کابینې ته وړاندې شي او ترهغه وروسته د پنځو کالو په لړ کې پلي کیږي.
ښاغلی غفوري وویل، له کومه ځایه چې د پستې ونې له څلورو کالو وروسته حاصل ورکوي، د کرنې وزارت په دې طرحه کې د کال ۳۰ میلیونه ډالرو د ترلاسه کولو په پار د ونو په منځ کې د زېرې کرکېله هم شامل دی. د طبیعي سرچینو او اوبولګولو مرستیال یادونه وکړه، چې د انجیل په دشت حوض کې د پستې د سوداګریزو بڼونو حاصل ته په رسېدو سره ټاکل شوې، چې د افغانستان د پستې په کلني صادراتو کې د ۷۰۰ میلیونه ډالرو په ارزښت صادرات زیات شي.
ددې ترڅنګ، د اوبولګولو او طبیعي سرچینو مرستیال وویل، چې یاده طرحه د چاپېریال ساتنې په برخه کې هم ګټور تمامیږي او د ۵۰۰ محافظتي بندونو (چکډمونو) په جوړېدو سره د اوبو د ضایعاتو مخه نیول کیږي او دغه راز د سېلابونو د کنټرول، د خاورې د فرسایش مخنیوی او د دوړو او خاورو د کچې ټېټولو لامل هم کیږي.
د اوبولګولو او طبیعي سرچینو مرستیال حشمت الله غفوري له خوا ددې طرحې د مالوماتو د وړاندې کولو په پای کې، د کرنې وزیر ډاکټر انوارالحق احدي، ددې طرحې هرکلۍ وکړ او له ښاغلي غفوري څخه یې مننه وکړه. دغه راز د کرنې وزیر دخپلو لارښوونیزو نظریاتو د وړاندې کولو ترڅنګ، ددې پروژې د پلي کېدو پر چټکتیا ټینګار وکړ.
