د پکتیا د شېدې ټولولو له لسو مرکزونو او د پروسس له مرکز سره اړینې مرستې وشوې

۱۰ مرغومې ۱۳۹۹
د پکتیا د کرنې، اوبولګولو او مالدارۍ ریاست د همکارې برنامې اړیکو دفتر په همکارۍ ددې ولایت د شېدې ټولولو له لسو مرکزونو او د شېدې د پروسس له یو لوی مرکز سره د اړینو توکو مرسته وکړه.
د پکتیا د کرنې رییس محمدالدین مومند وویل، چې په دغو مرسته شویو توکو کې د شېدې ټولولو لسو مرکزونو هر یوه مرکز ته د شېدې څلور ۵۰ کیلویي ډرمونه، دوه لیکټرو مترونه، یوه ترازو، یومیز، دوه پلاستیکي چوکۍ او له بیټرۍ سره یوه لمریزه تخته ورکړل شوي دي.
ښاغلی موند دغه راز وویل، چې ددې مرستو په لړ کې د لبنیاتو د پروسس مرکز ته یوه عراده یخچالي موټر چې ۳.۵ ټنه وړتیا لي او یو ۵۰۰ لیټره فریزر په ۵۰سلنې ونډې سره او ترڅنګ یې څلور ۵۰کیلویي ډرمونه، دوه لیکټو مترونه، یومیز او څور چوکۍ هم ورکړل شوي دي.
باید وویل شي، چې د شېدې ټولولو دغه لس واړه مرکزنه چې مرستې ورسره شوي دي، د پکتیا مرکز ګردیز او ددې ولایت په سیدکرم او احمد آباد ولسوالیو کې فعالیت لري.