کونړ کې د مالدارۍ سکټور د لا پیاوړتیا په پارهڅې

۱۰ لیندۍ ۱۳۹۹
د کونړ د کرنې، اوبولګولو او مالدارۍ ریاست چارواکي وایي، چې د مالدارۍ سکتور د پراختیا په پار یې هڅې پیل کړي دي، چې ورځ تر بلې یې وضعیت په ښه کېدو دی.
د کونړ د کرنې ریاست وایي، چې ددې ولایت په مرکز او ولسوالیو کې د مالدارانو وړتیا لوړولو په پار دوی ته په بېلابېلو برخوکې روزنیزې برنامې په لاره اچول، په اسټیشنونو کې مصنوعي القاح ترسره کول، څارویو ته د برسلوز، وړو شخوند وهونکو څارویو د طاعون او نورو ناروغیو د واکسینونو پروګرام پلي کول، د څارویو د عامه ساتن ځایونو دواپاشي، په حیواني محصولاتو او درملو کنټرول، د بی کفیته حیواني محصولاتو او تاریخ تېرو درملو له منځه وړل، په ولایتې حیوانې لابراتور کې د بېلابېلو حیوانې ناروغیو تشخیص، سیرویلانس، سیروسرویلانس او څارنه شامل دي.
ددې ترڅنګ د کونړ د کرنې ریاست او همکارو موسسو لخوا په کونړ کې د مالدارۍ سکتور د پیاوړتیا په موخه ګڼې برنامې پلي شوي چې، د کبروزنې ۲۰ بابه یو جریبه فارمونه او د کبانو بچیو د تولید یو باب هیچري جوړول، د شاتو مچیو روزنکو ته په یاده برخه کې اړونده توکې وېشل، د لبنیاتو د راټولونې ټولنې او د شېدوراټولو مرکزونه جوړول او په یادو برخو کې د اړوندو توکو وېش، د چرګانو روزونکو ټولنه جوړول او د چرګانو روزنې صنعت پیاوړی کول، پر مالدارانو د څارویو ۶۲۹ مټریک ټنه خوراکي توکې وېشل او د خصوصي سکټور ملاتړ په کې شامل دي، چې ددې ولایت د مالدارۍ سکټور د پراختیا په پار تر سره شوي دي.
د دغو برنامو په پلي کېدو سره د مالدارۍ سکټورخوندي، د ناروغیو کچه ټیټه او د څارویو محصولات ډېر شوي دي.