بدخشان کې د کچالو او پیازو زېرمتونونه ګټې اخیستنې ته وسپارل شول
۲۱ لړم ۱۳۹۹
د بدخشان ولایت د کرنې، اوبولګولو او مالدارۍ ریاست چارواکي وایي، چې په دې ولایت کې د کچالو او پیازو د زېرمتونونو رغنیزې چارې بشپړ او ګټې اخیستنې ته چمتو شوي دي.
د کرنې، اوبولګولو او مالدارۍ وزارت د کرنیزو محصولاتو مدیریت د پروژې له لارې په دې ولایت کې د کچالو ۷۵ زېرمتونونه او د پیازو ۵۶ زېرمتونونه جوړ کړي دي.
ددغو زېرمتونونو رغنیزې چارې بشپړ شوي دي، چې ورسره به ددې ولایت د بزګرانو د پام وړ پیاز او کچالو زېرمه او خوندي شي.
د یادو زېرمتونونو د جوړولو ټولیز لګښت ۶۶میلیونه او ۳۶۰زره او ۸۹۹ افغانۍ ده، چې ۹۰ سلنه لګښت یې د کرنې وزارت او لس سلنه نور لګښت یې برخمن شوي بزګران پرې کړي دي.
