د هرات صادروونکو او سوداګرو سره کتنه؛ د مسوولو بنسټونو په همغږی د کرنیزو محصولاتو د صادروونکو ستونزې هواریږي
۱۴ تله ۱۳۹۹
د کرنې، اوبولګولو او مالدارۍ وزارت سرپرست او نوماند وزیر ډاکټرانوارالحق احدي، هرات ولایت ته د خپل سفر په ترڅ کې ددې ولایت له صادروونکو او سوداګرو سره وکتل.
په دې لیدنه کې صادروونکو او سوداګر خپلې ستونزې د کرنې وزارت له سرپرست سره شریک کړل.
د کرنیزو محصولاتو ساتنې په پار د سړوخونو کمۍ او د یادو محصولاتو د صادراتو په برخه کې خنډونه هغه ستونزې وې، چې د صادروونکو او سوداګرو له خوا پرې خبرې وشوې.
په دې لیدنه کې دکرنې وزارت سرپرست او نوماند وزیر ډاکټرانوارالحق احدي د سوداګرۍ او صنایعو په وزارت کې د خپلو همکاریو مخینې ته کتو وویل، اوس چې هغه د کرنې وزارت مشرتابه پرغاړه لري هلې ځلې کوي، چې له سوداګرو او د کرنیزو محصولاتو له صادروونکو سره ښه همکاري ولري.
ښاغلی احدي د هرات سوداګرو سره په دې لیدنه کې ژمنه وکړه، چې د وضعیت په ارزونې سره هلې ځلې کوي، ترڅو د سوداګرو او د کرنیزو محصولاتو د صادروونکو ستونزې هوارې کړي.
باید وویل شي، چې دکرنې وزارت سرپرست هرات ولایت ته دخپل سفر په ترڅ کې، په دې ولایت کې د کرنیزو محصولاتو مدیریت د طرحې څه باندې زر ممیزخونې، د کرنیزو محصولاتو د پروسس شپږ کرښې، د شېدې ټولولو پنځه مرکزونه او د اوبولګولو یوه شبکه ګټې اخیستنې ته وسپارل.
