۳ وږی ۱۳۹۹

د کرنې، اوبولګولو او مالدارۍ وزارت په پام کې لري، چې سږکال د حیواني محرقې یا (بروسلوز) درې میلیونه او ۴۳۷ ډوزه واکسینونه وپېري او د هېواد په ۳۴ ولایتونو کې یې پر لوی او واړه څارویو پلي کړي. ددغو واکسینونو یوه اندازه پېرل شوي او پر څارویو پلي شوي دي او ټاکل شوې، چې د مالي کال تر پایه یاد ټول واکسینونه وپېرل شي او پر څارویو پلي شي.

دغه راز د وړو شخوند وهونکو څارویو لپاره د طاعون یو میلیون او ۹۳۲ زره او ۵۰۰ ډوزه واکسینونه پېرل کیږي او د هېواد په ۳۴ ولایتونو کې پر وړو څارویو لکه وزې او وریو پلي کيږي. ددغو واکسینونو یوه اندازه پېرل شوي او ټاکل شوې، چې د کال تر پایه یاد ټول واکسینونه وپېرل شي او پر وړو څارویو پلی شي.

دغه راز د «FMD»۲۰۰ زره ډوزه واکسینونه هم پېرل کیږي او د کابل، هرات، لوګر، پروان، میدان وردګ، کندهار، کندز، ننګرهار او بلخ په ولایتونو کې پر بېلابېلو څارویو پلي کیږي.

په ورته وخت کې د کرنې وزارت د کانګو تبې د مخنیوي په پار د هېواد په کچه د کنې د کنټرول پروګرام هم پلی کړی دی.

په همدې توګه د کرنې وزارت د بلخ، او بغلان په ولایتونو کې د وريو او وزو د نسل ګیري دوه فارمونه جوړ کړي او ترڅنګ یې د لوګر، خوست، کندهار او پکتیکا په ولایتونو کې د سایلج د ۱۵ سیلوګانو چارې، چې هر یوه یې پنځه مټریک ټنه وړتیالري بشپړ کړي. همداراز د کابل، کونړ، هملند، تخار او بدخشان په ولایتونو کې د مصنوعي القاح شپږ مرکزونه جوړ کړي، ددې ترڅنګ د شېدو ټولولو شپږ مرکزونه هم جوړ شوي دي، د کاپیسا، میدان وردګ، پکتیا او غزني په ولایتونو کې د پنځه کړۍ ژورو څاګانو کېندل او دغه راز د کابل او کندز په ولایتونو کې د درېوو حیواني کلینیکونو چارې د کال تر پایه بشپړیږي.