۲۱ زمری ۱۳۹۹

د کرنې وزارت ددې وزارت د بڼوالۍ او مالدارۍ ملي پروژې له لارې د جوزجان د مرکز شبرغان په ګډون ددې ولایت په دوو ولسوالیو کې څه باندې دوه زره مېرمنو ته د کرنې په برخه کې د کار زمینه برابره کړې ده.

دغه مېرمنې د کورنیو باغچو (بڼګیو) د پروژو په اډانه کې په کار بوختې دي. د کرنې وزارت د بڼوالۍ او مالدارۍ ملي پروژې د کارکوونکو له خوا د جوزجان کروندګرو مېرمنو ته د بېلابېلو سبو د کرکېلي، پالل او حاصل ټولولو لارې چارې ښودل کیږي او دمګړۍ دغه مېرمنې په خپلو کروندو کې په کار بوختې دي.

دغه مېرمنې چې ډېری یې د کورمېرمني دي، د کاري فرصتونو له نشتون څخه ګړېدل، ددې لپاره چې، اوس ښه عاید لرونکي دندې ترلاسه کړې دي د کرنې وزارت فعالیتونه ستایي او د جوزجان ولایت نورو سیمو ته هم د یادو چوپړونو پر پراختیا ټینګار کوي.

د کرنې وزارت د بڼوالۍ اومالدارۍ ملي پروژې له لارې پر دغو مېرمنو د سبو ۱۶ ډوله تخمونه وېشلي دي او ددغو مېرمنو له ډلې یوشمېر هغو ته یې په بېلابېلو سایزونو سره ګلخونې او دغه راز د سبو او مېوو د پروسس مرکزونه جوړ کړي دي.

د جوزجان ولایت یوشمېر کروندګرې مېرمنې ددې ولایت لرې پرتو ولسوالیو لکه قرقین، خماب او درزاب کې مېرمنو لپاره د کرنې وزارت د لا ډېرو مرستو غوښتونکې دي.

دوی وایي، یوه لاره چې تر دې دمه مېرمنې توانېدلي دي، چې د خپلو کورنیو د نارینه و ترڅنګ په خپل ژوند کې مثبت بدلون ایجاد کړي په کرونده او د کورنیو باغچو په برخه کې کار کول دي.

د یادونې وړ ده، چې د کرنې وزارت د بڼوالۍ او مالدارۍ ملي پروژه په جوزجان ولایت کې له څو کلونو را په دې خوا مېرمنو لپاره د کورنیو باغچو د جوړولو په برخه کې خپل کار پیل کړی، چې په تېر کې زرګونه نورې مېرمنې هم له دغو چوپړونو برخمن شوې دي.