بغلان کې یوشمېر بزګران او زده کړیالان د شنوخونو په برخه کې وروزل شول

۷ لړم ۱۴۰۵ هـ.ش
۱۷ جُمَادَى الأول ۱۴۴۸ هـ.ق
د بغلان ولایت د کرنې، اوبولګولو او مالدارۍ ریاست له لوري د شنو خونو د نوې کرنې د ترویج او د بزګرانو د تخنیکي وړتیاوو لوړولو په موخه، ۲۰ بزګرانو ته روزنیز پروګرام جوړ شو.
د یاد ریاست د کنېزو چارو عمومي مدیر عبدالله نیازي وایي، دغه روزنیز پروګرام د کرنې ریاست په انګړ کې د ترکیې هېواد د تیکا دفتر له لوري په جوړو شویو دوو شنو خونو کې ترسره شو.
د نوموړي په وینا، ټاکل شوې ده، چې د روان کال په اوږدو کې د آغاخان بنسټ له لوري یادو ۲۰ بزګرانو ته شنې خونې جوړې شي. له همدې امله، هغوی ته د شنو خونو د معیاري مدیریت او د نوې کرنیزې ټکنالوژۍ د کارولو په اړه عملي روزنه ورکړل شوه.
په دې روزنیز پروګرام کې د شنو خونو د کرنې نوې لارې چارې، د اوبو لګولو مدیریت، د نباتاتو د تغذیې اصول او د کرنیزو افتونو او ناروغیو د مخنیوي او کنټرول لارې چارې په عملي ډول ګډونوالو ته تشریح شوې.
د یاد پروګرام موخه د شنو خونو د کرنې دودول، د اوبو له سرچینو څخه اغېزمنه ګټه اخیستنه، د کرنیزو محصولاتو د کمیت او کیفیت لوړول او د بزګرانو د تخنیکي ظرفیتونو پیاوړتیا بلل شوې ده.
همدارنګه د سرپل ولایت د پوهنتون د کرنې پوهنځي ۲۰ محصلینو ته هم د علمي سفر په ترڅ کې په بغلان کې د شنو خونو د کرنې، مدیریت او تولید په اړه ورته روزنه ورکړل شوه.
د کرنې ریاست مسوولین وایي، د دا ډول روزنیزو پروګرامونو جوړول کولای شي د کرنې د نوې ټکنالوژۍ په دودولو، د بزګرانو د تولیداتو په زیاتوالي او د کرنیزو محصولاتو په کیفیت لوړولو کې مهم رول ولوبوي.