ننګرهار کې د غنمو ننداریزو کروندو لپاره اصلاح شوي تخمونه او کیمیاوي سرې ووېشل شوې

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په تخنیکي همکارۍ او د کرنې وزارت په مالي ملاتړ، د دغه ولایت په اوو ولسوالیو کې د غنمو ننداریزو کروندو لپاره اصلاح شوي تخمونه، کیمیاوي سرې او نغدي مرستې ووېشل شوې.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، دغه مرستې دره نور، اچین، سپین غر، هسکې مېنې، روداتو، نازیانو او بټي کوټ ولسوالیو هغو ټاکل شویو بزګرانو ته ورکړل شوې، چې د غنمو ننداریزې کروندې به جوړوي.
د نوموړي په وینا، هر بزګر ته د یوه جریب ځمکې لپاره ۱۶ کیلوګرامه د «نصرت »نوعه د غنمو اصلاح شوي تخم، ۵۰ کیلوګرامه سپینه سره، ۲۵ کیلوګرامه توره سره او د ځمکې د نرمکارۍ په موخه زر افغانۍ نغدې پیسې ورکړل شوې دي.
ښاغلي محمد زیاته کړه، چې د غنمو د ننداریزو کروندو موخه د اصلاح شویو تخمونو او نویو کرنیزو میتودونو دودول، د بزګرانو پوهاوی لوړول او د غنمو د حاصلاتو زیاتوالی دی. نوموړي وویل، د کرنې وزارت او همکارې مؤسسې هر کال بزګرانو ته اصلاح شوي تخمونه، کیمیاوي سرې او کرنیز وسایل برابروي، څو د کرنې په برخه کې د غوره لارو چارو په پلي کولو سره د تولید کچه لوړه او د بزګرانو اقتصادي وضعیت پیاوړی شي.