د ننګرهار هسکه مېنه کې د کوچیانو ستونزې واورېدل شوې او د حل په موخه د همکارۍ ډاډ ورکړل شو
۵ تله ۱۴۰۵ هـ.ش
۱۴ رَبِیعُ الْثاني ۱۴۴۸ هـ.ق
د ننګرهار د کرنې، اوبولګولو او مالدارۍ رییس مولوي عبدالستار محمد د هسکې مېنې ولسوالی د کوچیانو له استازو سره په لیدنه کې د هغوی ستونزې او غوښتنې واورېدې او د حل په موخه یې د هر اړخیزې همکارۍ ډاډ ورکړ.
په دې لیدنه کې د کوچیانو استازو، نازک میر او حاجي ابراهیم وویل، چې په هسکه مېنه ولسوالی کې شاوخوا ۳۰ زره واړه څاروي لري، خو د څړځایونو، حیواني درملو، واکسینونو، چنجیو ضد درملو، حیواني خوراکي توکو او نورو برخو کې له یو شمېر ستونزو سره مخ دي.
دوی د ننګرهار دکرنې رییس څخه وغوښتل، چې د خپلو مالونو د روغتیا، ساتنې او پیاوړتیا په برخه کې ورسره لازمې مرستې او همکارۍ ترسره شي.
د ننګرهار د کرنې رییس مولوي عبدالستار محمد د کوچیانو ستونزې مهمې وبللې او راغلو مسؤلینو او قومي مشرانو ته یې ډاډ ورکړ چې د افغانستان اسلامي امارت د نافذه قوانینو په رڼا کې به د شته امکاناتو تر کچې لازمې همکارۍ، همغږۍ او د ستونزو د حل لپاره هڅې ترسره شي.
