د کرنې وزارت مرستیال د صنعتي پارک د پرانیستې او له تولیدي فابریکو د لیدنې په موخه بلخ ته سفر وکړ
۲۹ وږی ۱۴۰۵ هـ.ش
۷ رَبِیعُ الْثاني ۱۴۴۸ هـ.ق
د کرنې، اوبولګولو او مالدارۍ وزارت مرستیال مولوي صدراعظم عثماني، د ریاستالوزرا اقتصادي مرستیال ملا عبدالغني برادر اخوند په مشرۍ د یوه پلاوي په ترکیب کې، د بلخ ولایت د صنعتي پارک د پرانیستې او د یو شمېر نویو جوړو شویو او پخوانیو صنعتي فابریکو د لیدنې په موخه دغه ولایت ته سفر وکړ.
د دغه سفر په ترڅ کې، د کرنې، اوبولګولو او مالدارۍ وزارت مرستیال او ورسره مل پلاوي د بلخ د صنعتي پارک له بېلابېلو برخو او یو شمېر تولیدي فابریکو څخه لیدنه وکړه او د دغو فابریکو فعالیتونه، د تولید کچه، شته امکانات او د صنعتکارانو ستونزې یې له نږدې و ارزولې.
مولوي صدراعظم عثماني د دغو لیدنو پر مهال د کورنیو صنعتونو پر پراختیا، د تولیداتو پر زیاتوالي، له شته ظرفیتونو څخه پر اغېزمنې ګټې اخیستنې او د تولیدي فعالیتونو د ودې لپاره د مناسبو شرایطو پر برابرولو ټینګار وکړ.
همدارنګه، د دغه سفر په ترڅ کې د نویو جوړو شویو او پخوانیو صنعتي فابریکو وضعیت وڅېړل شو او د فابریکو مسؤلینو د خپلو فعالیتونو، تولیداتو او اړتیاوو په اړه معلومات وړاندې کړل.
دغه سفر په داسې مهال ترسره کېږي، چې د کورنیو صنعتونو پراختیا او د تولیداتو زیاتوالی په هېواد کې د اقتصادي ودې او د کاري فرصتونو د رامنځته کېدو له مهمو عواملو څخه بلل کېږي.
