د ننګرهار کوټ کې د ډواني عمرخېل کانال د پاککارۍ چارې په چټکۍ روانې؛ ۱۵۰۰ کسانو ته د کار زمینه برابره شوې
۱۱ زمری ۱۴۰۵ هـ.ش
۱۸ صَفَر المُظَفَّر ۱۴۴۸ هـ.ق
د ننګرهار ولایت د کوټ ولسوالی د ډواني عمرخېل کانال د پاککارۍ چارې د ننګرهار د کرنې، اوبو لګولو او مالدارۍ ریاست په همغږۍ، د افغانستان د کلیو او بیاودانولو مؤسسې په تخنیکي همکارۍ او د «کورډیډ»مؤسسې په مالي ملاتړ په چټکۍ سره روانې دي، چې د اوبو د مدیریت د ښه والي ترڅنګ یې ۱۵۰۰ تنه د سیمې اوسېدونکو ته د لنډمهاله کار زمینه هم برابره کړې ده.
یاد کانال ۴.۵ کیلومتره اوږدوالی لري او د پاککارۍ له بشپړېدو وروسته به د سیمې کرنیزو ځمکو ته د اوبو رسونه منظم او اغېزمنه شي. د پروژې په لړ کې ۱۵۰۰ تنو ته د کار زمینه برابره شوې، چې تر دې مهاله ۱۲۵۱ کارګرو ته د شل ورځني کار په بدل کې هر یوه ته ۶۰۰۰ افغانۍ نغدي مزد ورکړل شوی دی.
د ننګرهار د کرنې، اوبو لګولو او مالدارۍ رییس، مولوي عبدالستار محمد، وویل چې د دغو کارګرو په مرسته تر اوسه ۳۴ واړه کانالونه پاک شوي او پر پاتې کانالونو هم کار په چټکۍ روان دی. د نوموړي په وینا، د یادو کانالونو له پاککارۍ وروسته به شاوخوا ۶۰۰ جریبه کرنیزه ځمکه په منظم ډول خړوبه شي، چې دا به د کرنیزو حاصلاتو په زیاتوالي، د اوبو د ضایعاتو په کمښت او د اوبو د اغېزمن مدیریت په برخه کې مهم رول ولوبوي.
په همدې حال کې، د افغانستان د کلیو او بیاودانولو مؤسسې د ګډ غبرګون پروژې مسؤل، محمد صالحي، وویل چې د کانالونو د پاککارۍ اساسي موخه د اوبو د مدیریت ښه کول، د اوبو د ضایعاتو مخنیوی، خلکو ته د لنډمهاله کاري فرصتونو برابرول او د خوړو د خوندیتوب پیاوړتیا ده، ترڅو کورنۍ وکولای شي خپلې لومړنۍ اړتیاوې په ښه ډول پوره او پر ځان بسیاینې ته نږدې شي.
هغه زیاته کړه، چې یادې مؤسسې تر دې وړاندې هم د ننګرهار ولایت په بېلابېلو ولسوالیو کې د اوبو د مدیریت د ښه والي لپاره د ګڼو کانالونو د پاککارۍ پروژې پلې کړې دي، چې د بزګرانو او د سیمې د اوسېدونکو له مثبت هرکلي سره مخ شوې دي.
