د کرنې وزارت د پلان او برنامو د همغږۍ لوی رییس د چارو ادارې د پالیسۍ او ستراتیژۍ له رییس سره وکتل
۶ زمری ۱۴۰۵ هـ.ش
۱۳ صَفَر المُظَفَّر ۱۴۴۸ هـ.ق
د کرنې، اوبولګولو او مالدارۍ وزارت د پلان او برنامو د همغږۍ لوی رییس مولوي عبدالعلي عمري، د چارو ادارې د پالیسۍ او ستراتیژۍ له رییس عبدالواحد عثماني سره په کتنه کې د کرنې سکټور د پالیسۍ د وروستي کولو او منظورۍ د بهیر پر چټکتیا ټینګار وکړ.
دغه لیدنه د همغږۍ او تخنیکي غونډې په چوکاټ کې د کرنې وزارت د سلاکارانو او د چارو ادارې د کارپوهانو په ګډون ترسره شوه. مولوي عبدالعلي عمري د کرنې سکټور د پالیسۍ د جوړولو په بهیر کې د چارو ادارې له همکاریو څخه د مننې ترڅنګ، د دې سند د ژر تر ژره منظورۍ پر اهمیت ټینګار وکړ او هغه یې د هېواد د کرنې سکټور د پراختیا او پیاوړتیا لپاره یو مهم ګام وباله.
په همدې حال کې، د چارو ادارې د پالیسۍ او ستراتیژۍ رییس عبدالواحد عثماني د کرنې سکټور د پالیسۍ په چمتو کولو او ترتیب کې د کرنې وزارت له همکاریو څخه مننه وکړه او ویې ویل، چې د افغانستان اسلامي امارت د کرنې سکټور پراختیا ته ځانګړې پاملرنه لري او د چارو اداره به هم د دغه بهیر د لا ښه پرمخ بېولو لپاره خپلې اړینې همکارۍ دوامدارې وساتي.
د غونډې په پای کې دواړو لورو د افغانستان د کرنې سکټور د لا غوره پراختیا په موخه د همغږۍ پر دوام، ګډو همکاریو او د چارو د اجرایي بهیر پر لا پیاوړتیا ټینګار وکړ.
