د افغانستان د کرنې وزیر د ازبیکستان د لومړي وزیر له مرستیال سره وکتل
۵ زمری ۱۴۰۵ هـ.ش
۱۲ صَفَر المُظَفَّر ۱۴۴۸ هـ.ق
د افغانستان اسلامي امارت د کرنې، اوبو لګولو او مالدارۍ وزیر، مولوي عطاءالله عمري، د ازبیکستان جمهوریت د لومړي وزیر له مرستیال، جمشید خواجهیف، سره، چې د یوه لوړپوړي پلاوي په مشرۍ افغانستان ته راغلی، د اسلامي امارت د ریاستالوزراء په دفتر کې وکتل او خبرې یې ورسره وکړې.
په دې کتنه کې، چې د ازبیکستان جمهوریت کې د افغانستان اسلامي امارت سفیر هم ګډون درلود، دواړو لورو د دوهاړخیزو اړیکو د پراختیا، د افغانستان د کرنې، مالدارۍ او اوبو لګولو په برخو کې د شته فرصتونو، د اقتصادي همکاریو د پراختیا او په یادو برخو کې د ګډو پروژو د پلي کېدو په اړه هر اړخیزې خبرې او د نظرونو تبادله وکړه.
مولوي عطاءالله عمري په دې غونډه کې د افغانستان د کرنې او مالدارۍ په برخو کې د پانګونې شته ظرفیتونه او فرصتونه تشریح کړل او د ازبیکستان د حکومت له مسؤلینو او د خصوصي سکټور له استازو یې وغوښتل، چې له شته فرصتونو څخه ګټه پورته کړي او په دغو برخو کې پانګونه وکړي.
په همدې حال کې، د ازبیکستان د لومړي وزیر مرستیال د افغانستان د کرنې او کرنیزو ماشینآلاتو په برخه کې د پانګونې لېوالتیا څرګنده کړه او ویې ویل، هېواد یې د افغانستان کرنیزو محصولاتو، په ځانګړي ډول پنبې، کچالو او نورو کرنیزو تولیداتو ته اړتیا لري او چمتو دی چې د تولید د پراختیا، پروسس او له افغانستان سره د ګډو همکاریو په برخه کې کار وکړي.
د غونډې په پای کې، دواړو لورو هوکړه وکړه، چې د مطرح شویو ژمنو او توافقاتو د ارزونې او عملي کولو لپاره به یو ګډ تخنیکي ټیم جوړېږي، څو د کرنې په برخه کې د دواړو هېوادونو ترمنځ د همکاریو بهیر په اغېزمنه توګه پر مخ ولاړ شي.
