د کرنې وزارت د کرنیزو او مالدارۍ محصولاتو د سړو خونو د جوړولو، بیارغونې او اغېزمنې استفادې میکانیزم وڅېړه
۲۷ چنګاښ ۱۴۰۵ هـ.ش
۳ صَفَر المُظَفَّر ۱۴۴۸ه.ق
د کرنې، اوبو لګولو او مالدارۍ وزارت د پالیسۍ او پلان رییس، مولوي احمدالله اتل، په مشرۍ په یوې غونډه کې د کرنیزو او مالدارۍ محصولاتو د سړو خونو د جوړولو، بیارغونې او اغېزمنې استفادې میکانیزم د اړوندو وزارتونو او ادارو د استازو په حضور کې وڅېړل شو.
په دې غونډه کې، چې د مالیې، صنعت او سوداګرۍ، عدلیې، اقتصاد وزارتونو، د ملي پراختیا شرکت، د چاپېریال ساتنې ملي ادارې او د کرنې وزارت د یو شمېر تخنیکي ریاستونو استازو ګډون کړی و، د سړو خونو د اغېزمنې ګټې اخیستنې، د کرنیزو محصولاتو د ضایعاتو د مخنیوي، د ساتنې د ظرفیت د لوړولو او د دغو تاسیساتو د مدیریت د پیاوړتیا په اړه هر اړخیز بحث او د نظرونو تبادله وشوه.
د چمتو شوي میکانیزم له مخې، وړاندیز شوی چې غیر فعالې سړې خونې له ارزونې وروسته بېرته ورغول او فعالې شي، د نوو سړو خونو د جوړولو اړتیاوې د تخنیکي مطالعاتو او د کرنیزو تولیداتو د کچې پر بنسټ وټاکل شي، او د دغو مرکزونو د اغېزمن مدیریت او ګټې اخیستنې لپاره د دولتي بنسټونو او خصوصي سکټور ونډه لا پیاوړې شي.
همدارنګه، د سړو خونو د څارنې، ارزونې او معلوماتو د ثبت لپاره د منظم سیستم پر رامنځته کولو، د اړوندو کړنلارو پر جوړولو، د خصوصي سکټور د پانګونې پر هڅونې او د دې پروګرام د معیاري پلي کېدو لپاره د لازمې زمینې پر برابرولو ټینګار وشو.
د غونډې په پای کې پرېکړه وشوه، چې د مطرح شویو وړاندیزونو او نظریاتو له وروستي راټولولو او ترتیب وروسته، د راتلونکو اجراآتو لپاره د کرنې، اوبو لګولو او مالدارۍ وزارت رهبرۍ ته وړاندې شي.
