پکتیکا کې د لسګونو ونو د ناقانونه وهلو قضیه ثبت او عدلي مراجعو ته وسپارل شوه

۲ چنګاښ ۱۴۰۵ هـ.ش
۷ مُحَرَّمُ الحَرام ۱۴۴۸ه‍.ق
د پکتیکا ولایت د کرنې، اوبو لګولو او مالدارۍ ریاست اړوند د نعمت اباد ولسوالی د ځنګلاتو د ساتنې مسؤلینو د خپلو دوامدارو څارنو په ترڅ کې د ونو د ناقانونه وهلو یوه قضیه ثبت او د قانوني اجراآتو لپاره یې اړوندو قضایي مراجعو ته وسپارله.
د یاد ریاست د معلوماتو له مخې، د قدرتي سرچینو د ساتنې په موخه د ترسره شویو څارنو پر مهال څرګنده شوه، چې د نعمت اباد ولسوالی د زمین کلي یوه اوسېدونکي شاوخوا ۷۰ دانې غټې او وړې ونې په ناقانونه ډول پرې کړې دي.
چارواکي وایي، د قضیې له ثبت وروسته د قانوني تعقیب او لازم اجراآتو په موخه ټول اسناد او شواهد د نافذه قوانینو او اصولو له مخې اړوندو قضایي ارګانونو ته سپارل شوي، ترڅو د موضوع په اړه لازمې پرېکړې وشي.
د پکتیکا د کرنې، اوبو لګولو او مالدارۍ ریاست ټینګار کوي، چې د ځنګلونو او قدرتي سرچینو ساتنه د دې ادارې له مهمو لومړیتوبونو څخه ده او د طبیعي شتمنیو پر وړاندې هر ډول ناقانونه فعالیت به په جدي ډول تعقیب شي.
د یادونې وړ ده، چې ځنګلونه د چاپېریال ساتنې، د خاورې د تخریب مخنیوي، د اوبو د سرچینو د پیاوړتیا او د اقلیمي بدلونونو د اغېزو د کمولو په برخه کې مهم رول لري. له همدې امله د پکتیکا د کرنې ریاست له ټولو هېوادوالو غوښتنه کوي، چې د قدرتي شتمنیو په ساتنه کې له مسؤلو ادارو سره همکاري وکړي او د ونو له ناقانونه وهلو او نورو زیان رسوونکو کړنو څخه ډډه وکړي.