د خوست ځاځي میدان ولسوالی کې پر لسګونو بزګرانو د سبو او مېوو وچولو ماشینونه ووېشل شول
۴ غبرګولی ۱۴۰۵ه.ش
۸ ذُو الحِجَّةِ ۱۴۴۷ه.ق
د خوست دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د «اوآرډي» مؤسسې په تخنیکي همکارۍ ددې ولایت د ځاځي میدان ولسوالی پر۳۵ بزګرانو د دوی اقتصادي ودې ته د زمینې برابر ولو په پار د سبو او مېوو وچولو ماشینونو د وېش لړۍ پیل کړی دی.
ددې مرستې د وېش پرمهال د «اوآرډي» مؤسسې چارواکو د ذکرشوو ماشینونو د اهمیت او ارزښت په اړه خبري وکړې زیاته یې کړه، چې د سبو او مېوو د رفع حاصل پر وخت یې بیې ټیټ او بزګران نشي کولای چې د غوښتنې مطابق عواید ترلاسه کړي، چې وچول یې اسانه او معقوله لار ده. په همدی اساس مو د ملګرو ملتونو د خوړو او کرنې ادارې په مالي لګښت وشوو کولای د ۳۵ بزګرانو ستونزو ته رسېدنه وکړو.
دغه راز د خوست دکرنې ریاست چارواکو دکرنې ریاست په استازولۍ د ملګرو ملتونو د خوړو او کرنې ادارې او همکاري مؤسسې «اوآرډي» مسؤلینو ته د هرکلی ترڅنګ د «اوآرډي» مؤسسې د ښې او پروخت همغږۍ، باکیفیته او شفاف کارونو له امله مننه او قدردانې وکړه، او بزګرانو ته یې هدایت وکړه چې د ماشینونو څخه په مؤثره توګه استفاده وکړي او هم یې ښه ساتنه او حفاظت وکړي.
د خوست ولایت کرنې، اوبو لګولو او مالدارۍ ریاست د ورته پروګرامونو له لارې هڅه کوي، چې د کرنې سکتور پیاوړی کړي، د بزګرانو اقتصادي وضعیت ښه کړي او د هغوی د عوایدو زیاتوالي زمینه برابره کړي.
