د کندهار نېش ولسوالی کې د تورو چکډېم د کیفیت ارزونې څارنه ترسره شوه

۱۳ غویی ۱۴۰۵ه‍.ش
۱۶ ذُو ٱلْقَعْدَةِ ۱۴۴۷ه‍.ق
د کندهار د کرنې، اوبو لګولو او مالدارۍ ریاست تر رهبرۍ لاندې او د قدرتي سرچینو آمریت د مستقیمې څارنې په ترڅ کې، د نېش ولسوالی د تورو چکډېم څخه د کیفیت ارزونې او ودانیزو چارو د پرمختګ د څارنې په موخه تخنیکي لیدنه ترسره شوه.
د یاد چکډېم څارنه د انجنیر نورمحمد همکار او انجنیر محمد حامد سعادت له لوري ترسره شوې، چې موخه یې د رغنیزو چارو د کیفیت ارزونه، د کارونو نږدې څارنه او د پروژې د پرمختګ ډاډ ترلاسه کول وو. د لیدنې پر مهال مسؤلینو او قراردادي شرکت ته لازمې سپارښتنې وشوې، ترڅو پروژه په لوړ معیار، ټاکلي وخت او غوره کیفیت سره بشپړه شي.
انجنیر نورمحمد همکار وویل، چې د دغې پروژې څخه وخت پر وخت جدي او دوامداره څارنه ترسره کېږي او روانې چارې په نږدې توګه ارزول کېږي. د نوموړي په وینا، دغه چکډېم د باراني اوبو د مهار، د اوبو د ضایع کېدو د مخنیوي او د سیمې د کرنیزو ځمکو د خړوبولو په موخه جوړېږي.
هغه زیاته کړه، د پروژې په بشپړېدو سره به د سیمې بزګران او اوسېدونکي د اوبو ښه سرچینې ته لاسرسی ومومي، شاړې ځمکې به بېرته زرغونې شي او د ځمکې لاندې اوبو کچه به هم لوړه شي.
د یادونې وړ ده، چې د تورو چکډېم پروژه د کندهار د کرنې ریاست په هڅو او  د ملګرو ملتونو د خوړو او کرنې ادارې «اف‌اې‌او» په مالي ملاتړ د ۲۸۲ زره امریکایي ډالرو په ارزښت پلې کېږي، چې اوس مهال یې ودانیزې چارې په منظم ډول تر څارنې لاندې روانې دي.