دهلمند ولایت د عشر چارواکو سره د همغږۍ ناسته ترسره شوه
۹ غویی ۱۴۰۵ه.ش
۱۲ ذُو ٱلْقَعْدَةِ ۱۴۴۷ه.ق
د هلمند ولایت د کرنې، اوبولګولو او مالدارۍ ریاست مقام په لارښوونه، د مرکز لښکرګاه او د ولایت د ۱۸ ولسوالیو د عشر چارواکو سره د همغږۍ، انسجام او د چارو د لا ښه تنظیم په موخه مهمه ناسته ترسره شوه.
په یاده ناسته کې د عشر د تنظیم آمر مولوي محمد عمر، د عشر او زکات د محاسبې آمر قاري مولوي نورمحمد محمدي، اړوند مسؤلینو او د بېلابېلو ولسوالیو د عشر مسؤلینو ګډون کړی و.
غونډه د عشر د چارو د لا ښه تنظیم، د طرزالعملونو د دقیق تطبیق، له ولسونو سره د نیک چلند، د راټولولو د بهیر د شفافیت، حساب ورکونې، او د مسؤلینو ترمنځ د لا پیاوړې همغږۍ پر موضوعاتو راڅرخېده.
د ناستې ګډونوالو ته ټینګار وشو چې د عشر د راټولولو او تنظیم په برخه کې دې له بزګرانو، مالدارانو او عامو خلکو سره له نرمۍ، حُسن اخلاقو او اسلامي اصولو سره سم چلند وشي، څو ولسونه له ادارې سره د باور او همکارۍ فضا نوره هم پیاوړې کړي.
همداراز مسؤلینو ته لازمې سپارښتنې وشوې، چې د عشر اړوند ټولې چارې دې د نافذه اصولو او منظور شوي طرزالعمل له مخې پر مخ یوسي، په راپور ورکونه کې دې روڼتیا او دقت ته ځانګړې پاملرنه وکړي، او د هرې ولسوالۍ مسؤلین دې په خپل وخت د خپلو اجراآتو بشپړ راپورونه له ریاست مقام سره شریک کړي.
د غونډې په پای کې مسؤلینو د عشر د چارو د لا ښه سمون، منظم تطبیق او له ولسونو سره د لا نږدې همکارۍ ډاډ څرګند کړ، او ژمنه یې وکړه، چې خپلې سپارل شوې دندې به په پوره امانتدارۍ، اخلاص او مسؤلیت سره ترسره کوي.
